文章寫於2017年1月22日
2017年1月3日 (二) – DAY 3 (上) *因為太長所以分做兩篇 😛
計劃行程
實際行程
涉地可支 -> Aqua Planet海洋世界 (11:10海洋劇場 & 12:20濟州海女文化) -> 午餐: Aqua Planet內food court -> 城山日出峰 (15:00海女海撈潛水表演) -> 碼頭日落 -> 晚餐: 일출봉등경돌식당
今次我亦用咗Google Maps嚟紀錄我去過嘅地方，大家可以入去初步了解吓再睇詳細遊記：
出發開始今日嘅行程之前食返尋日便行店買嘅brownie先，係好好味架，佢好重朱古力味同保持到brownie嘅濕潤！好味到我有諗過要唔要買呢塊餅做手信，但便利店嘅存貨保鮮期都唔夠長就算了哈。
因為今日嘅行程都幾密，怕唔夠時間，所以8點左右就出咗門口。我哋決定先搭701去신양리입구 정류장 하차站，再行45分鐘去涉地可支섭지코지 (제주특별자치도 서귀포시 성산읍 섭지코지로 107)。
呢個係沿途嘅海景，仲可以見到城山全貌，見到咁靚嘅景行都行得開心啲。其實我覺得慢慢行欣賞沿途風景先叫做真正感受呢個城市。
到涉地可支啦！涉地可支係一個有唔同建築物嘅郊區，範圍都幾大，所以想慳時間唔行咁多路，嚟到呢度你可以租架電動車遊園。我雖然想玩，但今次無租了，因為見有啲路係要行上山，架車到時就要泊低好似好麻煩咁哈。
見唔見到呢張相嘅重點？其實我係覺得舊石好似一隻青蛙望緊天 😛
呢幅相左手邊嘅玻璃屋其實係一間餐廳，佢係韓劇藍海傳說嘅其中一拍攝場地。睇人哋影嘅相，因為有落地玻璃，入面可以一邊食野一邊欣賞無盡嘅海景。本身我都諗住去食，但最後唔夠時間 🙁
又係睇海時間，個景色有幾分似墨爾本大洋路嘅十二門徒石。
沿海岸行途中會見到呢間糖果屋，前身係教堂建築物，係以前另一套韓劇嘅拍攝場地。韓國真係好多劇組嚟涉地可支取景。
用咗一個鐘欣賞涉地可支，大約10點3就開始起行去Aqua Planet海洋世界한화아쿠아플라넷 제주 (제주특별자치도 서귀포시 성산읍 섭지코지로 95)。本來預要行半個鐘，最後只需要15分鐘。
因為11:10海洋劇場就開始，所以入場後即搵路去欣賞咗海洋劇場先，都真係搵咗一陣路，所以大家都要預時間～海洋劇場我無咩影相，得呢張影得唔好嘅，專心睇嘛哈哈。佢係有故事鋪陳嘅，幾特別，大家去親身欣賞吓啦。
海洋劇場完後時間啱啱好可以去下一個地方睇12:20嘅濟州海女表演。呢個表演呢… 我諗有啲人會覺得無聊，因為只係水缸內表演，但都算係可以認識吓海女點樣無工具下潛落水底捕撈海產。呢度都有同觀眾互動環節，好多父母帶小朋友睇。
參觀完Aqua Planet，喺入面嘅food court食埋午餐都差唔多2點，係時候要走了。出到戶外，天朗氣清，更清楚望到城山，我跟住要去嘅地方 😛
