上年香港突然hit起嘅一款甜品，聽聞係有一間店開始賣，跟住個蛋糕就喺香港出咗名了。再加上其實呢款蛋糕相對易做，所以都有好多人喺屋企跟住整啦～包括我，雖然遲咗一年哈。

雖然係上年就hit，但其實我都係今年先食過。第一次應該係朋友用氣炸鍋整嘅版本，但當時唔知佢叫巴斯克芝士蛋糕，以為係普通嘅芝士蛋糕，只因為用咗氣炸鍋先係嗰種質地。跟住比較深印象係屋企人買咗小念頭嘅版本，但嗰次得細細哋一舊，可能物以罕為貴，嗰日突然覺得呢款蛋糕好好食，發現嗰種creamy口感同其他芝士蛋糕好唔同，我鍾意呢種冇咁實嘅質地。

於是喺五月尾我搵咗馬田食譜，跟馬田整咗一次 (但無落檸檬汁/酒)：https://www.youtube.com/watch?v=DRYCe5YKEh8
今次無點影相，但我用嘅材料例如吉士粉 (下面會提到點解哈)、黃糖、蛋嘅款式同蛋撻嗰次一樣，而步驟詳細都係跟足馬田，所以先唔講咁多啦～

今次有跟落雲呢拿醬，多謝朋友送 🙂 ：

但果然第一次點都會有少少唔順利，因為原來屋企有嘅係七吋蛋糕模，而我跟咗六吋蛋糕嘅份量材料嚟整，就搞到個蛋糕好扁啦 😛

另外要特別提一提，馬田提到喺個粉漿入面要加少少麵粉去幫助佢凝固，但嗰時嘅我懶得去搵包麵粉出嚟，所以就用咗吉士粉代替。但就意外咁令到呢個巴斯克芝士蛋糕變咗焦糖燉蛋口味，而我阿妹後來話佢幾鍾意呢個特別味，而我自己其實都鍾意食自己整嘅哈。

有咗呢個第一次少少fail經驗 (因為扁 😛 )，加上想整吓比同事朋友試，我好快喺六月頭就再試整。但今次想試整返傳統La Viña Bar口味 (巴斯克芝士蛋糕就係起源於西班牙呢間餐廳)，所以就搵咗Cassandre嘅食譜，而呢個食譜咁啱份量就係俾七吋蛋糕模嘅，唔使計數哈：https://www.youtube.com/watch?v=ELnts-e1bp0
因為想試最傳統口味所以我無跟食譜加雲呢拿醬同檸檬汁。

材料 (7吋圓形蛋糕模)：
忌廉芝士 450g
黃糖 135g
雞蛋 3粒
鮮忌廉 225g
低筋麵粉 11g

今次影多咗相，所以可以簡單紀錄返。Cassandre係用機做攪打，而我係全程用手打，其實都唔會太攰。

首先係混好450g忌廉芝士同135g黃糖 (因為屋企無白砂糖哈)：

跟住3粒雞蛋分次混入：

跟住加埋過咗篩嘅11g低筋麵粉：

再加225g鮮忌廉混和之後過一次篩就得啦：

因為Cassandre嘅成品係比我想要嘅質地實，我最想整到好似下面飲食男女介紹咁有少少流心 (Youtube同文字版都係archive，你會發現有啲嘢你唔捍衛就會一夜間無咗 🙁 )：https://www.youtube.com/watch?v=cJ2jxWk7R9s / https://archive.ph/Z3VLj (文字版)

但因為我嘅焗爐無淨上火，所以跟唔到了，我最後應該係跟呢個youtuber，230-240度25-28分鐘去焗：https://www.youtube.com/watch?v=7lgzm65Q1tc

另外因為我嘅蛋糕模係無底嘅，所以用咗托盤去托底哈。

一焗出嚟佢嘅焦色仲係好淺無光澤，俾阿妹話似發霉… 呢個時候唔可以撕牛油紙住，蛋糕會好易甩皮甩骨。

跟住攤涼後焦色色澤越嚟越似樣，蛋糕都降返低：

撕得牛油紙啦，個邊位都幾靚 😀

不過最後都係做唔到我想要嘅流少少心效果 🙁 但係味道先係重點嘛哈，配返杯咖啡正 😛

其實流唔流心除咗焗嘅時間影響，仲要雪少過一個鐘先可以有流心效果。所以就算我整到流心，人哋食嘅時候都一定唔會係流心。最後我拎去請同事朋友食，佢哋都有讚好食呢，成功 😀