6日5夜濟州釜山獨樂樂 – DAY 1

6日5夜濟州釜山獨樂樂 – DAY 1

文章寫於2016年5月15日

第一日 3 MAR 2016 (THU)

原計劃:

落實行程:

2:30 HK -> 6:35 Jeju -> 機場櫃員機提款 -> Kodakkodak Guesthouse -> 信不信由你博物館 -> A Twosome Place -> 泰迪熊博物館 -> 每日偶來市場


仲可以Google Maps睇下我全個trip住過同去過玩嘅景點:


坐咗3個幾鐘飛機,終於到濟州啦~到之後第一件事當然係去兌錢先啦!其實上網睇過資料,最抵兌韓幣嘅地方係當地嘅找換店。不過基於濟州無首爾咁發達,比較少找換店,所以我決定喺機場櫃員機兌咗先。後來番香港睇番紀錄,發現櫃員機匯率都唔太差,我兌咗50萬won,匯率係0.00634,加埋每次HKD20手續費,實際匯率可以當係0.00639。而上網睇首爾找換店匯率大約係0.00632,所以差唔多啦 😛

講番櫃員機位置,據我記得濟州機場唔大,好似入境之後落一層向便利店方向行前少少就見到。我係用中間全灰色部機兌嘅,至於點兌,因為我無影相,介紹大家去下面嘅網站看圖:https://k.she.com/lifestyle/2015/02/韓國atm提款方法/

有錢就係時候出發去Kodakkodak Guesthouse放低行李再去玩啦!我決定坐600號巴士到”New Kyeongnam Hotel”站落車再行大約5-10分鐘路過去。600號巴士其實係當地嘅機場大巴,會由機場來回濟州區域同西歸浦區域著名嘅景點酒店,對於初到當地嘅觀光客嚟講比較易搭。去機場出口Gate 5就搭到啦,上車之後同司機講你會邊度落,再俾錢司機就得,會有張車飛俾番你。我第一日住嘅地方屬於西歸浦區域,所以全程5500won,坐大約75分鐘。韓巢有600號巴士嘅詳細路線圖加地圖,大家可以睇下啱唔啱自己搭:http://cn.konest.com/contents/airbus_map.html?no=188

Kodakkodak Guesthouse到!一入到去間嘢無人,以為接待人員可能出咗去,坐一陣之後覺得唔對路,唔可以再等,所以決定敲下大堂唯一嘅一度門,點知真係有人應門… 有位叔叔開門,望入去係一間鋪哂被嘅房,睇嚟係接待人員 (屋主?) 訓嘅地方。之後呢位叔叔睇過我張BOOK房紙就俾咗條鎖匙我啦,好簡單又快嘅check-in程序。

其實我呢6日都book咗附浴室嘅單人房,本身有諗過住share room,但臨book嘅時間就轉軑haha 我都覺得自己好矛盾,有時想識新朋友,但有時又想摺埋自己唔講嘢,因為平時要講太多。同埋有無私人浴室都係我嘅考慮因素。不過最後我都幾慶幸自己呢個trip book咗單人房,因為之前講過,我係咳住去旅行,唔使講嘢真係幾好哈。

間房雖然望落舊,不過都幾舒服,浴室都乾淨。其實間房無蛇蟲鼠蟻對我嚟講已經好夠。

因為一陣要再趕時間搭車去中文區嘅博物館,無時間食個正式嘅早餐,所以食住件機場便利店買嘅手卷頂住先。啲手卷全部都係韓文,我一粒字都唔識,於是是旦選咗個。最後發現呢件應該係泡菜味手卷,仲諗住咳緊唔食咁多辣嘢添。

出發去搭車,之前plan行程時明明搵過 “BUS 120/130 (中文觀光園區入口 중문관광단지입구정류장站) or BUS 5/110 (中文觀光園區內 중문관광단지정류장站)” 可以到中文區嘅信不信由你博物館同泰迪熊博物館,點知行行行去車站… (下圖係經過嘅風景)

車站係搵到啦,但等咗十幾廿分鐘都無車。到最後,我決定搭番600號巴士去,因為我知佢會經過,同班次密。呢一程要2000won,雖然應該貴過我原本plan坐嘅巴士,不過錢可以換時間都好。

搭咗半個鐘左右車,終於到啦,係咁搭車搭到有啲暈車浪哈哈。首先去信不信由你博物館。其實係幾有趣嘅,我留咗都有一個鐘以上慢慢睇。佢的確幾啱鍾意睇新奇嘢嘅人,但我估唔係咁多人鍾意去旅行去博物館,加上呢個博物館其實其他國家都有,即係唔夠獨特。所以如果要我介紹景點,其實我唔會推薦佢哈。因為我都算係鍾意戶外多過戶內景點嘅人,只係今次係自己一個去,唔太敢去山卡拉嘅地方。同埋係第一日,所以先選hea啲嘅活動行下博物館。

佢嘅外觀係幾型。

篩選咗幾幅我最鍾意嘅圖,因為好有style,好啱做影相背景。可惜我係自己一個,只可以用自拍神棍,影唔到型相 🙁

呢個係成個館我覺得最特別嘅展品,紙巾咁柔軟同薄都可以整到條婚紗裙,勁!其他展品就等大家自己去睇,保持神秘感嘛。

參觀完信不信由你博物館,去泰迪熊博物館前食個午餐時,嗰時好似都已經3點幾。我見到有漢堡包店,但唔知係咪因為咳,唔係好想食。最後選咗呢間A Twosome Place食個甜品做午餐。好好味呀!個多士係啱啱整好熱辣辣嘅。

好,食完hea咗陣再出發去泰迪熊博物館。我諗呢度吸引遊客嘅魅力同信不信由你博物館一樣,唔知會唔會係更唔吸引呢。原因唔係佢嘅展品差,而係我諗除非係鍾意泰迪熊或者其他熊仔,唔係嘅話應該無咩興趣行。就好似我唔會去Hello Kitty嘅博物館。對於我嚟講,雖然我唔係鍾意泰迪熊,但對熊仔係多一份親切感嘅,所以當我見到啲展品有咁多唔同衣著嘅泰迪熊,都係睇得幾開心。

啲相只係show咗好少部份嘅展品,有興趣睇更多嘅自己去啦~

用咗成個下晝參觀兩個博物館,好奢侈。係時候回程啦,又係搭番600號巴士,所以點解我一開始話600號係遊客嘅好朋友。本身諗住去埋天地淵瀑布先去每日偶來市場搵嘢食,點知天公不造美,落雨搞到無咩心情周圍去,所以決定直接去每日偶來市場。呢個係沿途見到嘅風景,幾靚,好似就係天地淵瀑布嘅起點。

去到市場嘅時候都7、8點啦,買咗支好好味嘅濟州特產漢拏柑汁。唔知係因為我肚餓定點,呢枝柑汁比起我另一個地方買嘅真係甜好多好味好多,所以去到濟州想試漢拏柑汁我推介大家幫襯呢間,都幾易認,好似得呢間會喺樽外加個生果套。

至於今日嘅晚餐… 據我記得係唔好食嘅豬雜,我係買番guesthouse食的。其實我本身想買血腸,但唔識溝通嘅情況下就變咗淨豬雜。而豬雜我本身都唔怕食,可惜佢比咗好多唔好食嘅豬肝我,同埋有苦味嘅豬腸 🙁

我嘅第一日就係咁過了。

發佈留言