文章寫於2016年5月15日

一切要由2015年9月講起… 無錯！我係半年前就買咗2016年3月去濟州釜山嘅機票哈哈。無辦法啦，多數平機票都要遲啲出發嘅日子先有。

無記錯嘅話，嗰時HKE做緊320蚊單程機票優惠，呢個價錢比起之前嘅1蚊、8蚊機票當然無咁吸引，不過同平時去濟州嘅價錢比，呢個算OK啦～都因為佢唔算好平，所以先比我買到，唔係一早唔夠快比人搶哂。但係呢，我就發現得3月3號濟州出發先有呢個價錢，回程無哂平飛。咁點算呢… 釜山3月8號回程好似有平！我又未去過釜山，一於濟州去釜山回，試埋搭內陸機哈哈。結果，我就喺3月獨自踏上呢個韓國闖蕩之旅 (可惜我最後係病住去 🙁 )

不過等等，咁濟州去釜山嗰程呢？我好好彩咁10月有一日突然記起要買內陸機票，跟住去search下之前去首爾搭過嘅Jeju Air，居然見到佢咁啱做緊promotion，於是就買咗哈哈。

下個post會正式開始行程介紹，未睇詳細介紹之前不妨以Google Maps睇下我住過同去過玩嘅景點啦 😛

Daum Maps介紹

行程介紹之前，我都想同大家分享下我今敞旅程最好嘅助手 – Daum Maps。去過韓國旅遊嘅人plan行程嘅時候大多會聽過韓巢Konest，佢提供中文版嘅韓國地圖同公車資料，方便唔識韓文嘅旅客可以到韓國輕鬆定位搵路。不過有傳聞話韓巢地圖喺濟州定位唔太準，用總部喺濟州嘅Daum Maps會好啲，濟州資料更新比其他地圖快。既然人哋咁講，為保險我就用Daum Maps啦～

可惜Daum Maps有個缺點，就係無中文版。不過睇完網上教學點用之後，我覺得佢其實好適合去旅遊前會plan好行程嘅人 (即使唔識睇韓文)。而我就係呢種會搵好想去咩地方，同個地方嘅韓文名/地址嘅人哈。如果你同我一樣，歡迎繼續睇落去，睇下Daum Maps點樣喺當地幫到你輕鬆到達目的地。

Daum Maps網址：http://map.daum.net/
(2020再睇返佢改埋名叫kakao map，咁唔知下面嘅介紹仲有無用… 如果已經完全唔同哂大家就當以下內容單單係我嘅旅遊回憶啦，提供唔到有用資訊俾大家添)

當你諗好哂想去嘅景點同餐廳之後 (至少要有佢地嘅韓文名，有埋地址仲好)，如果只想搵佢個位置，其實你只需要進入Daum Maps再search店名就可以啦 (同Google Maps用法一樣，只係變咗全韓文)。但我想介紹俾大家嘅當然唔係咁簡單，而係另一個用法 – 將地點加入我的最愛，到時直接click就得。不過首先你要申請做會員，點申請我就唔教啦，大家可以上另一個網睇：https://maggiehsu18s.pixnet.net/blog/post/32256469

不過要注意，Daum Maps後來加多咗個驗證碼步驟，要打韓文。對於唔識韓文嘅人，手機下載Google Translate個app，佢嘅圖片翻譯做韓文功能會係你嘅好幫手。”加入我的最愛”同”Google Translate App圖片翻譯”嘅詳細介紹可以睇呢度：http://elfinsostar.pixnet.net/blog/post/58649872

當你將所以景點都擺哂入我的最愛之後，下一步就係用手機下載Daum Maps個app，跟住就可以咩都唔駛做，等到當地之後慢慢輕鬆搵路搵車啦。Daum Maps個app點用其實上面提及嘅網站都有簡單介紹，不過我都唔可以咁懶嘅，用幾張圖片示範一下俾大家睇啦。

當我第一日想知道點由hostel去第一個景點 – 信不信由你博物館，打開個app，依圖所示click右上角再click星星目錄 (未登入會叫你登入)

跟住選中間”我的最愛”，會出現如下圖所示我儲存咗改埋名嘅一堆景點

選咗信不信由你博物館之後，會去到地圖，click箭咀，代表想搵點去呢度

跟住click一下上面個框，選由邊度出發去信不信由你博物館

又係選中間”我的最愛”

我由hostel出發，當然就係選hostel個名啦

跟住只要click一下巴士嘅圖示

所有可以搭嘅巴士路線就會出哂嚟，以110號巴士做例子

Click入去就會出現詳細資料，包括會經過嘅站名、搭幾耐、幾多個站、邊度落車等 (好重要！濟州嘅巴士就算有行車顯示屏，有時都只會得個站嘅韓文名，我都係靠睇住個app先知自己仲有幾多個站先落車)。

想睇地圖嘅話，只要click右下角嘅地圖圖示就得。

可以click一下左上角嘅定位，咁就可以一邊行車一邊睇自己去到條路線嘅邊個位。用法大致上係咁啦，對於唔識韓文嘅我，當時需要用到嘅功能都只係咁多，唔敢亂按haha 其他就靠你哋自己發掘啦。