週末快閃重慶之旅 – DAY 3 & 4 (完)

週末快閃重慶之旅 – DAY 3 & 4 (完)

文章寫於2016年12月10日

2014年9月13日 (六) – DAY 3

渝都酒店 -> 磁器口古鎮 -> 洪崖洞 -> 朝天門 -> 解放碑廣場

重慶一日遊正式開始!

之前提及過重慶幾似香港,其中包括鐵路系統,都係四通八達,靠鐵路就可以去好多景點。不過重慶嘅係空中輕軌,因為佢係架設喺空中嘅,所以搭輕軌可以俯視重慶,欣賞景色一流。

今日入住嘅渝都酒店 (渝中區八一路168號) 係輕軌2號線臨江門站附近。但因為拎住行李唔方便由華辰國際大酒店行路去輕軌站搭車,所以我選擇搭的士去最近嘅輕軌站先再轉搭輕軌。去到酒店其實仲未到下晝,但好好彩已經有得checkin,可以直接入房放低行李,唔使寄存櫃檯。雖然話就話平價酒店,比唔上前兩晚住嘅五星級酒店,但其實質素都唔差,幾乾淨企理。

酒店坐落解放碑廣場,係重慶嘅商業區中心,有好多食肆同商場。下面第二幅圖左下角就係解放碑啦,係重慶嘅標誌建築物之一。

解放碑廣場咁近酒店,我決定留番今晚有時間剩先行,無就聽朝再行都得,反正下午先飛。咁放低行李之後就出發去輕軌1號線磁器口站嘅磁器口古鎮行下先啦~

落車之後要先行經呢條好多小販賣嘢嘅天橋。因為已經2點仲未食嘢,我喺度幫襯咗一檔食物 (無影相唔記得係咩添,只記得係辣嘅同唔太好食)。

行多5分鐘就見到磁器口古鎮嘅門牌啦,好有中國古代特色。

磁器口古鎮其實有啲似台灣嘅九份,又係斜斜地嘅路,街兩邊好多賣唔同嘢嘅鋪頭,頭頂掛住燈籠。

不過賣嘅嘢食就同九份唔同啦,有好長嘅串燒肉,同埋當然係中國獨有嘅食物,例如呢一碗叫涼糕。我最鍾意試新鮮嘢,所以見到即刻忍唔住買嚟食。網上搵到資料,涼糕來自四川宜賓,係用粘米粉同生石灰整成嘅,食嘅時候會加入紅糖漿。雖然網上話佢食落Q彈順滑,但我覺得我買嘅呢碗涼糕唔算Q彈,似豆腐花同仙草嘅中間,不過就真係幾順滑,食嘅時候可以滑入喉嚨咁。味道上呢,其實我覺得舊涼糕本身係無味嘅,食嘅應該係後加嘅糖漿嘅味。可惜佢加嘅糖漿好甜,所以食到後期已經唔係享受,而係只因為唔想浪費逼自己食哂佢。同埋因為係用米漿整成,所以食哂成個都幾飽肚,短時間內食唔到其他小食 🙁

行行下就行到龍隱門。因為磁器口古鎮又名龍隱鎮,而龍隱門就係由嘉陵江碼頭進入古鎮嘅必經之路,所以大家會見到龍隱門後有水,其實就係嘉陵江啦。不過… 我諗因為太多遊客同埋自己本地人嚟玩,除咗水依舊好黃外,嘉陵江近陸上邊緣仲有好多垃圾,只係我避開咗無影。

因為有啲口渴,就喺龍隱門附近嘅飲品店買咗杯青檸特飲。跟住再閒逛一陣見到有檔賣章魚丸,見涼糕好似已經落咗格,就決定買一盒順便坐下休息。佢嘅章魚丸估唔到係幾好食,粉漿唔太厚,章魚都大粒。其實間鋪外圍好靚的,造到好似小橋流水咁,可惜無影到相。

休息完就行到鄰近龍隱門嘅磁器口橫街,去重慶之前已經計劃咗要去呢度,因為睇相有好多特色嘅咖啡館哈哈。啲咖啡館外觀好多都裝修佈置得好有文青感覺,喺度行下會覺得自己係文青哈。

時間唔早,要開始起行去洪崖洞,可以搭輕軌2號線去臨江門站行過去。搭輕軌沿途有長江相伴,可惜江水係黃嘅。

到洪崖洞嘅時候大約6點半,呢度又係另一個好多小店賣嘢食同雜貨嘅地方。洪崖洞依山而建,有幾層高,佢比磁器口古鎮少店鋪,但就多啲特別景觀,設計到好似身處叢林。

天色開始昏暗,係時候食晚餐,因為唔算好肚餓,我淨係買咗一兩串雞肉牛肉同呢碗甜品醫肚。肉串雖然無影到,但佢燒得好好,食落肉質好嫩滑。而呢碗雜錦芋圓同生果就唔太甜,啱哂我好好味 😛

個天真係黑哂了,洪崖洞開始亮燈,俾人一種同日頭唔同嘅感覺。我語文造詣唔好形容唔到,自己睇相感受下哈。

另外呢個洪崖滴翠小瀑布係洪崖洞建築一部份,係咪真係好有叢林嘅感覺呢?

講咗咁耐,都未同大家講今次嚟重慶我係無買上網卡嘅,所以點行去各個景點其實都係靠事先準備。行完洪崖洞大約7點半,我決定去一去Starbucks買杯嘢飲順便上下網。因為原本plan去朝天門加搭下長江索道,但依家怕時間唔夠,要重新諗下去邊好。

就係咁hea咗半個鐘,最後我決定照”行”去朝天門但就唔搭長江索道啦。行咗大約半個鐘終於到朝天門,沿海旁行下,欣賞咗一陣夜景。

9點幾了,係時候起行去最近嘅輕軌小什子站搭去臨江門站返酒店。

玩咗一日,返番嚟解放碑廣場,旅程接近終點,俾張解放碑夜景全相俾大家睇啦。

————————————————————————————————————

2014年9月14日 (日) – DAY 4

解放碑廣場 -> 15:10 重慶江北國際機場 -> 17:25 香港國際機場

尋晚無時間行解放碑廣場,所以今日就去行下啦。其實都無咩啱我買,因為呢邊好多都係名牌店。所以最後都係食物吸引我,去買下呢敞旅程嘅最後一餐先。選擇咗酒店樓下買一堆串燒同重慶出名嘅酸辣粉返酒店食。酸辣粉呢… 其實我已經叫咗小辣,但唔知係佢無做到定重慶人真係食開超超超辣,我食咗一啖已經頂唔順要倒走啲湯加水溝稀佢,但其實都仲係幾辣,我都唔記得我有無食哂。串燒呢… 就比我想像中差,可能因為唔夠熱,但都算有味嘅。

食完最後一餐就出發離開重慶啦,我嘅快閃重慶之旅就喺呢度結束了~

發佈留言