文章寫於2010年6月19日

其實我第一次見到天使熊 (英文名係 Peter Bear 呀) 係喺日本城，而且永遠只會喺日本城先至見到佢，所以我相信佢係日本城出嘅。而的確，我喺日本城個網都見到佢有一個咁嘅 logo，證明日本城”曾經”好著重天使熊。

依家喺日本城已經搵唔到天使熊嘅公仔 (至少我去過嘅都冇咗)，極其量只係搵到佢嘅少少精品，真係得一兩件 eg. 風扇仔，所以我諗日本城應該係唔會再出天使熊嘅新野嫁啦 🙁

仲記得喺之前，入到去日本城搵一陣就會見到成排小天使熊掛喺到俾人買，即係好似下圖咁 (取自日本城個網)，同依家比真係差好遠，依家我想買多幾隻都搵唔到啦 (如果你見到邊度有，請留言同我講)

日本城冇咗佢哋之後，我上網搵過發現冇咩人提起過佢哋，應該係冇咩人識，冇咩人同我一樣咁鍾意，所以想同人哋買都唔得啦。

你會問點解我咁鍾意天使熊?

我諗係因為我想識飛 (佢有翼)

我想成日笑 (佢係有笑容嘅熊仔)

我鍾意可愛嘅野 (佢頭大身細，我覺得公仔頭大身細最可愛haha)

我鍾意粗框眼鏡，所以點解我最鍾意戴粗框眼鏡嗰隻 (其實話時話，佢嗰副應該係太陽眼鏡，因為呢隻本身係有埋水泡架，不過俾唔知邊個整唔見咁解)

好啦，簡單介紹完，想睇多啲相就睇呢區嘅其他文章啦！