一向鍾意試新嘢嘅我對手作嘢都特別有興趣，因為當你一手一腳由零整出一件嘢之後你就會更了解佢嘅運作原理，學到樣新嘢嘅感覺真係好正 😛

仲記得我細細個已經有幻想拆開個時鐘嚟睇佢係點整，但最後都係得個諗字無做過。又諗過發明個睇報紙器，可以自動翻頁，咁就唔使睇報紙睇到成手墨哈。雖然全部得個諗字，但睇嚟我從小就有呢個好奇心同想整嘢嘅夢… 所以當我幾年前知道南豐紗廠有間店有DIY機械錶工作坊，其實一直都好想試，好想知一隻錶點整出嚟同試下自己整出嚟，但因為都要千幾蚊，搵朋友一齊去玩難啲，又唔想自己一個去就算了。

直至有日突然網上見到有公司賣DIY機械錶嘅kit，真係正合我心意，有齊材料可以俾你喺屋企自己整，整完啲工具又可以收藏，將來想維修錶或者換零件都可以用得著。同埋其實都想當禮物送俾阿妹戴嘅 (雖然依家係我戴多啲 😀 )，而因為屋企已經有隻白色classic款DW錶，所以就決定呢隻機械錶買黑色款啦～

同南豐紗廠嘅DIY機械錶工作坊一樣，呢個DIY機械錶嘅kit都係用video嘅形式嚟教你砌錶嘅。我後來發現南豐紗廠店嘅DIY錶款同DIY Watch Club嘅好似差唔多，唔知個kit其實係咪間店出嘅呢？

拆開包裝會見到好多工具，望落好pro咁哈。跟住就係跟video instruction慢慢逐步整啦。其實整落會發現無想像中咁複雜，雖然佢寫要用大約兩個鐘，但其實”順利嘅話”一個鐘內都已經整得完。因為要做嘅嘢就係將零件逐層疊上去，最難嘅應該係擺針 (但因為我嘅款無日期同秒針，所以易好多) 同抹塵。對我嚟講抹塵最難，因為要仔細望到一粒塵都無要好有耐性 😛

上面要特登強調順利嘅話其實係因為我第一次砌時做到最後裝所有零件入錶框嗰步時先嚟出錯裝歪咗，結果個鏡面連機芯歪歪地卡死咗喺錶框入面… 結果我需要喺個open-heart位格硬撬成舊嘢出嚟，真係撬咗一輪先撬到，當時好驚整裂個鏡面或者整壞個機芯咁千幾蚊就無咗 🙁 好彩最後個鏡面只係花咗少少，機芯好似都無事 (其實我都唔知係咪，至少仲郁到哈)。

因為撬完啲零件鬆咗，所以就要拆哂所有嘢從頭嚟過。第二次砌就好順利完成啦，好似半個鐘就整好。而花咗嘅鏡面都好好彩錶框遮到 😛

不過可能我當初期望太高，我心中最理想嘅DIY機械錶其實係想連機芯都自己砌 (但其實諗諗吓係無咩可能，因為真係精工，應該要專業先整到哈)，所以我會形容呢個kit DIY嘅部份只係將零件逐層疊上去，可以落手做嘅事唔多，但整完的確可以了解到機械錶運作，近距離望到錶入面機芯每一部份都係好好嘅體驗嚟嘅～

有興趣嘅人我會覺得join南豐紗廠嘅DIY機械錶工作坊二人同行會抵過買呢個kit，因為學到睇到玩到嘅嘢一樣，但就平啲之外仲有專人在場有咩事可以幫到你嘛 🙂