6日5夜濟州釜山獨樂樂 – DAY 2

6日5夜濟州釜山獨樂樂 – DAY 2

文章寫於2016年5月15日

第二日 4 MAR 2016 (FRI)

原計劃:

落實行程:

飯捲店 다정이네 김밥 -> 李仲變文化街 -> Aji Hostel -> 三代湯麵會館 -> 東門市場 -> 龍淵橋 -> 龍頭巖 -> 東門市場


仲可以Google Maps睇下我全個trip住過同去過玩嘅景點:


瞓完個靚覺又食嘢啦,今朝plan咗去食網上出名嘅紫菜飯捲。間嘢叫다정이네 김밥,佢喺我住嘅guesthouse步行可到嘅範圍內,不過都要10幾分鐘。

10點左右到達,入到去入面一個客人都無,睇嚟係我太遲食早餐。以為會有人問下我想食咩,點知老細有佢哋整佢哋嘅紫菜飯捲無理過我。基於我半句韓文都唔識,就諗住可能佢哋忙緊啫,忙完就會主動理我問我想食邊款,到時先指俾佢哋睇。於是我就企喺度乖乖等… 等咗一陣有個叔叔入嚟,同老細講咗一輪嘢之後,同我對望幾下跟住就同我講嘢啦。嗰時嘅我以為佢係員工之一想問我食咩,所以就指個menu俾佢睇,我叫咗第一個2000won嘅,跟住就見到佢同老細再講一輪嘢。

um… 應該搞掂啦,可以坐低等食。

(下圖menu由左至右好似係:
多情飯捲、小魚乾飯捲、辣味飯捲、辣味小魚乾飯捲、鮪魚飯捲、油豆腐飯捲、芝士飯捲、泡菜飯捲、烤肉飯捲、炒肉飯捲、豬排飯捲、海苔飯捲)

入面得3張台,坐位數量10個左右。雖然舊,但啲裝飾好文青又幾靚。坐底等等等,明明見佢整完一份又一份,又無其他客,點解整極都未輪到我,唔通好多外賣客。等待嘅中途見到個叔叔成日望過嚟再回頭同老細吹水,諗緊係咪討論緊我呢個遊客呢,不過我應該無咩值得店員討論架。後來我就發現原因啦… 個叔叔拎咗一袋啱啱整好嘅紫菜飯捲走。原來佢唔係店員,佢都係客人 (應該係,我諗唔會係送外賣掛)!我居然叫咗另一位客人幫我落單,難怪佢要同老細討論下我啦。

紫菜飯捲終於送嚟,打開鍚紙一睇,多情飯卷應該係指最普通我哋見開嘅韓國飯捲。雖然全程老細無同我講過嘢,由我入嚟到走都無向我展露過笑容。但佢嘅飯捲確實係好食嘅,啲米好有咬口,同日本食開嘅飯有得揮。同埋啲配料都好豐富,配搭埋啲米酸酸甜甜好快俾我KO哂。

食完早餐就行去李仲變文化街感受下我無嘅… 藝術氣息。上網查過,呢條街係為咗紀念李仲變呢位濟州出身嘅藝術家而設立嘅。為咗配合藝術家形象,街上好多藝術擺設,同埋好多小店賣自己嘅手作品。其實我本身以為仲可以見到一啲素人藝術家嚟呢邊街上擺攤販賣自製嘅藝術品,好似一個市集咁 (因為見到人哋嘅旅行相有)。但我嚟到就見唔到有人擺攤,連行人都好少,一度以為係咪去錯地方,其實未到咁。後來當然確定位置啱,我諗冷清應該一係因為唔係星期六日,一係仲早掛。不過一場嚟到,等我都慢慢由街頭行到街尾,逐間鋪頭入去睇睇先。最後喺呢邊買咗條依家都未帶過嘅皮手繩哈。

行到大約11點幾,係時候番guesthouse拎埋行李去下一個目的地 – 濟州區嗰邊。今次無得搭600號巴士啦,因為巴士唔經濟州市區嗰邊,而係直接上機場。

要去我下一個住嘅地方Aji Hostel就要搭 “BUS 782 (제주지방법원 정류장站) 再轉 BUS 500/37/87/7/6/36/5/1003 (관덕정정류장站)”。一路搭782號巴士一路諗,因為睇咗天氣報告,聽日好似會落雨。而我聽日要去嘅地方正正係成個旅程我最期待嘅, 因為有得去茶喜然綠茶博物館玩Zipline!如果真係落雨實玩唔到… 但如果今日去,佢下晝6點就關門,我放低行李先去嘅話都唔知仲有無時間玩。但唔放低行李,一路揹住去茶喜然又好似好chur,同埋唔知嗰度有無locker俾我擺低嘢。喺矛盾嘅心情下搭住呢程車,直到就嚟要落車去轉車… 嗰時大約1點幾,我決定chur就chur,都係唔落住啦,到濟州市外巴士轉運站先落啦。

因為*如果有BUS 981*,由濟州市外巴士轉運站搭到茶喜然大約要80分鐘 (上網查到嘅),所以如果咁啱有車,都可以3點左右到,應該仲玩到Zipline 😛

諗住自己呢個plan都幾好啦,點知… 搵極都搵唔到981號巴士個站牌。去詢問處問,果然,981號巴士唔係呢度開出。順便問職員應該點去,佢就寫咗張紙仔話我知要搭701先再轉981… 搵站牌問職員折騰咗一陣都2點啦,諗到如果要轉車搭車時間又要預耐啲,去到可能都玩唔到,所以最終決定搭車折返Aji Hostel,聽日去唔去到茶喜然唯有聽天由命。

講番Aji Hostel嘅check-in過程都幾驚險。Book呢間hostel之前都睇過下comment,有人提到呢度係個婆婆負責,佢係完全唔識英文嘅。不過都有人提到佢有個仔有時會喺度,個仔就識少少英文,所以我都有心理準備可能check-in時要用身體語言。點知今次我嘅情況係一入門口無人喺度,有一扇窗口,不過關咗。以為同第一間guesthouse一樣,可能有人喺窗口另一邊,但今次講咗幾聲韓文你好都無人應。於是我決定行樓梯上一層,就見到有個婆婆好似啱啱打掃完,諗住佢可能就係傳說中唔識英文嘅婆婆。開始一邊講check-in一邊用身體語言表達訓覺俾佢睇,佢又會跟番我做訓覺嘅動作,好似明我想check-in,但佢又無任何行動要落一層幫我check-in,同埋keep住喺上層同我用韓文講嘢。

搞咗一兩分鐘,佢就跟住我落樓啦,不過唔係幫我check-in,而係打開窗口。跟住我唔記得佢有無講嘢,都留意唔到佢有無打電話。但過咗一分鐘左右,奇蹟就發生啦,有位中年男人行入屋,跟手幫我check-in。原來呢個婆婆唔係負責人?定佢係,只係見同我雞同鴨講先決定搵個仔嚟搞呢?真係唔知啦哈。

今次呢間房都係獨立房連浴室,感覺上同第一間差唔多,都係乾淨企理,浴室花灑同去水都唔錯。

Check-in埋已經2點幾了,係時候去搵下一餐食。今次選咗都係可以行路到嘅三代湯麵會館,不過就遠少少,要行15-20分鐘。

豬肉湯麵係濟州嘅代表美食之一,韓國觀光公社都有介紹。其實平時嘅我好鍾意食麵類,拉麵、雲吞麵、米線米粉呀,但就係唔太鍾意粗麵,因為試咗一次車仔麵選粗麵之後覺得唔夠彈牙。所以見到網上介紹豬肉湯麵嘅相,啲麵條好似粗麵,都無特別抱有咩希望,諗住叫去試過下特產就算。點知!呢個湯麵可以話係我今次韓國之旅食過最好食嘅鹹食。佢嘅麵條係又滑又彈牙架!啱哂我口味。佢嘅豬肉都係唔鞋,而且唔肥膩,配合個清淡嘅湯頭,唔會俾湯頭擔咗豬肉陣味。仲有就係有位嬸嬸員工可能見我係遊客,怕我唔食得太辣,特登俾個小碗我盛起啲辣醬,要幾多自己預,好貼心。對於我呢位咳緊嘅病人,呢個舉動真係合哂我心意哈哈 (啲辣醬真係幾辣)。另外佢有紫菜碎可以加,加完再飲淡湯,即刻多咗陣鮮味。

食完嘢之後,因為東門市場網上資料話開 09:00 至 18:00,而佢又係出名手信平,一早決定要去呢度掃手信嘅我怕聽日無時間去,就決定依家去下先啦。呢個係沿途風景,連公園仔嘅牆上都畫咗畫,真係充滿藝術氣息。

濟州真係好多柑味或者其他奇怪味嘅朱古力手信,夾心朱古力啦,朱古力脆米啦等等。但我嘅目標只有一個,就係掃一堆之前上網見到有人推介嘅呢隻Jekiss朱古力柑乾脆片,因為我覺得佢幾有特色,同應該唔太甜。

點知,去到行完一圈都唔見有呢款,問埋幾個老闆都話無,淨係見到佢嘅白朱古力版。

睇嚟呢度已經無再賣牛奶朱古力版啦,但白朱古力又唔係個個鍾意,點算好呢。其實雖然無咗Jekiss版,但呢邊仲有另一隻牌子出嘅朱古力柑乾脆片嘅。於是我就決定各買一兩盒拎番hostel試完味,好食嘅先再入貨。

我發現市場呢邊嘅老闆好興你幫襯完,佢哋會送一堆散裝嘅朱古力俾你。其實就係佢哋嘅各種朱古力手信,都好好彩有佢哋呢個舉動,先可以俾我試味睇下邊隻手信啱我買。但試完嘅結果係… 好多都好甜,唔啱我食 (我淨係會買我覺得好食嘅嘢做手信,唔理啱唔啱人哋食哈哈)。

睇下買下就已經5點幾6點,番埋hostel擺低戰利品就出發行去龍淵橋啦。龍淵橋個名由來聽講係傳說過去有龍王子喺呢度出現過。其實條橋個樣唔係好特別,又唔長唔高,不過黃昏時當佢嘅燈飾著咗,再配合個未黑哂嘅天又幾靚。如果個位可以睇到日落就仲正 (我當日睇唔到,應該真係睇唔到?)

另外可能因為條橋嘅位置可以望海都幾浪漫,佢都有個別名叫情人橋。橋旁邊整咗個情人鎖裝飾俾情侶自己帶鎖頭嚟掛,寓意將愛情鎖住,咁就可以長長久久。

本身上網得知龍淵橋旁有間叫金喜善濟州馬尾藻湯嘅店,一心諗住嚟食,因為馬尾藻湯就係另一樣濟州特產美食。點知原來佢收7點,只差一點點!我搵到佢嘅時候好似係7點左右,啱啱關門無耐。無做足功課嘅後果 🙁

好啦,我決定聽朝要再嚟過,我係唔會輕易放棄美食架!

依家唯有繼續行程,沿海邊行去睇龍頭巖 (好近龍淵橋,5分鐘內行到)。上網有人話呢度不值一去,因為完全睇唔出個龍頭。um… 似唔似就各花入各眼啦,我就覺得我影嘅呢個角度都睇得出,係幾得意嘅,但真係望幾眼就完。

食唔到馬尾藻湯,又要再諗過我嘅晚餐。今朝經過東門市場好似見到有樣海鮮個樣好特別,仲可以做刺身 (後來番到香港search先知佢叫海菠蘿)。最後決定去東門市場睇下鋪頭關咗未,未嘅買刺身試下都好。

左選右選,本身想買雜錦刺身,但好似全部雜錦都唔包海菠蘿,結果我選咗一盒清一色海菠蘿做晚餐。試咗一舊之後,原來唔係我想像中嘅爽口,而係軟淋淋嘅… 仲有少少腥味 (不過我相信唔係壞嘅,只係生鮮本身嘅腥味)。再加上佢配嘅醬汁係辣醬,唔係醬油,唔啱我口味,點唔落手。但買咗成盒無理由浪費,所以就迫自己一舊接一齊唔點汁咁食,終於好痛苦咁食哂… 下次真係唔可以再買清一色嘅魚生,真係會食到滯,不過我食完無肚痛都幾勁幾好彩哈。

發佈留言