2015年6月5日 (五) – DAY 2

我哋住嘅酒店Brustar Gotic都算鄰近巴塞隆拿好多唔同出名景點，都係步行範圍半個鐘之內，包括呢度最出名嘅建築 – Sagrada Família聖家堂。今日本身plan咗上半晝去行聖家堂。8點半由酒店出發，但當行到時就發現門口已經排滿好多人，所以我哋最後淨係即場買到1pm入場嘅門票。未入到就影住張聖家堂外圍相先啦哈。

喺聖家堂隔住高第大道嘅對面係Hospital de la Santa Creu i Sant Pau聖十字聖保羅醫院。因為兩個景點距離好近，於是我哋就決定先參觀醫院再去聖家堂。

其實我對建築物係無咩sense，同埋個人偏好自然風景，又無宗教信仰，所以我只係抱住嚟到點可以唔朝聖嘅心態，參觀時淨係識得望吓相關歷史，睇吓啲建築幾宏偉幾特別就算，係完全唔識評論佢哋嘅建築風格呢類哈。所以大家想知多啲就自己去搵其他人嘅文啦 😛

聖十字聖保羅醫院係全世界最古老嘅醫院之一，但後期因應人口需求就決定將設備等遷移到現代化啲嘅建築。原有建築經修復後就唔再以醫院模式運作，而係開放俾人參觀。

上網睇資料，下圖三葉草形窗框係象徵天主教「聖三位一體」。

參觀完醫院就夠鐘可以行返去聖家堂入場了。由醫院望去對面就已經見到聖家堂。

聖家堂之所以咁出名，其一當然係佢嘅設計每一個位置都做得好細緻，但都因為咁，令到呢座教堂由1882年開始修建到今時今日都未完工，以尚未完工就列為世界遺產嘅建築物而聞名。其他歷史大家就自行搜索啦，或者有機會現場參觀先感受到佢嘅宏偉，因為未去過聖家堂等於無嚟過巴塞隆拿 😛

雖然我無宗教信仰，但因為小學係讀基督教小學，所以都有聽過聖經，知道耶穌釘十字架呢回事。呢個雕塑就係描繪緊呢件事，另一張影到光線軌跡令到成件事變得更神聖。

參觀聖家堂到差唔多4點幾就出發去Park Güell奎爾公園。呢個公園係由加泰羅尼亞一位名建築師高第設計嘅，巴塞隆拿入面有好多呢位建築師設計嘅出名建築，睇完會知道佢係鍾情於拼貼、波浪形曲線同規則幾何嘅設計，同埋多數都色彩繽紛，對比周邊建築好突出。

奎爾公園嘅設計好突顯到高第鍾情波浪形曲線呢點，而今日最後一個行程去嘅Casa Vicens文森之家 (不過無入去參觀，淨係外面影張相)，我覺得就能夠突顯規則幾何，同樣都有色彩拼配。

最後就慢行返酒店休息了。今日嘅一日三餐都冇相片記錄，所以唔記得自己當日食過咩嘢 🙁