9日8夜日本京阪神奈之旅 – DAY 1

9日8夜日本京阪神奈之旅 – DAY 1

文章寫於2017年8月13日

DAY 1 (2014年7月11日)

凌晨時份踏上飛機,瞓完一覺就到大阪啦。

嗰時嘅我仲後生,所以雖然唔算瞓得好好,搭完凌晨機都唔會話好累。我相信依家嘅我應該都仲得嘅,係會差少少咁啦 😛 到埗之後就直接去咗坐往京都嘅車,我哋玩京都先。

搭咗個幾鐘車終於到啦,一出站就見到好有日本傳統文化特色嘅牆。

同埋第一次嚟日本,對日本所有嘢都有新鮮感,所以連普通列車都影一餐 😀

現在所在地京都。後生嘅我哋唔需要補眠,直接去四条烏丸站嘅酒店放低行李就再出發去參觀啦!

我哋決定先去睇京都最出名嘅嘢 – 寺廟,就近近哋清水寺先啦。沿途行去搭車見到有人路中心搭緊嘢,應該就嚟有大型慶祝活動。

11點嘅時候就到清水寺範圍啦。行上清水寺路上沿途兩邊有各式食肆同賣手信嘅鋪頭,不過我哋決定先參觀清水寺,落山先行呢啲鋪頭。

終於行到近距離見到清水寺外圍啦~其實我對建築物興趣唔係好大,所以都係望一望欣賞下佢嘅色彩線條就算。

入面都幾大,呢度有幾個涼亭,俾人潔淨雙手嘅設施,同祈福嘅掛板。通常入日本嘅寺廟同神社祈福前都要先潔淨雙手,代表神聖尊重。

由於係山上,所以仲可以遠眺京都市區同一個唔知咩塔。

另外入面有個地主神社俾人求姻緣嘅,我同朋友當然要求下先啦 😛 半吉嘅係我,而事實證明我當時真係唔係太吉哈。

以上介紹嘅都係免費參觀嘅庭院範圍,跟住呢度就真係寺嘅主殿啦,要收費先入得嘅。如果就啱季節嚟,呢度影出去嘅葉會轉咗色,好靚的。

一場嚟到,都要求番個清水寺嘅符。

最後去埋呢個叫音羽の滝嘅泉水池飲番啖水就完結清水寺之旅啦。搵資料得知泉水係由音羽山湧出,三道泉水各有意思,由左至右分別係求學問成就,戀愛成就,同延命長壽。每個人只可以飲一種,否則祈求嘅願望就唔會實現。而且只可以一啖,飲越多啖祈求嘅願望就會實現減半,甚或得番三分之一,如此類推。唔記得我當時係飲咗邊度呢,但我記得我無多飲 😛

跟住就係慢慢行返落斜,去街道兩邊鋪頭睇手信同食嘢啦。

行到大約4點就搭車返京都市區,去四条烏丸站附近嘅錦巿場,再行街。錦巿場人稱京都嘅廚房,行下呢類市場可以體會下京都人平時生活會食咩買咩。

第一日去到呢度就無再影相啦,所以我相信因為時間唔早,唔知去邊好,所以就去咗商場shopping哈。

發佈留言