2015年6月10日 (三) – DAY 7

研討會嘅行程完結，跟住落嚟就係旅行啦！

先去食個西班牙出名嘅薯蛋餅做早餐。

跟住同朋友一齊買咗一盒幾件嘅雪糕解暑，每人食咗兩三件 😀

今日主要係去參觀市區各個高第設計嘅藝術建築物。首先去咗米拉之家Casa Mila，睇返資料佢係高第設計嘅最後一個私人住宅，特徵係純白石材外牆同波浪形嘅外觀。

其實巴塞隆拿嘅藝術建築景點好多都有語音導覽嘅耳機租借，但我哋無借到，聽聞導覽講解得幾好，鍾意藝術嘅人建議租借。

佢中庭係中空，直接陽光採光。

跟住到我最鍾意嘅天台，因為可以喺高處望出去遠處。同埋呢個天台設計到有啲似之前睇嘅Park Guell，變純白版 😛 但我發現我好似冇影到好多相，可能掛住用心欣賞哈哈。

之後就去咗睇巴特略之家Casa Batllo，佢建築早於米拉之家。資料指米拉先生係因為欣賞高第為巴特略先生設計嘅巴特略之家先請高第設計出米拉之家。

內裏有模型介紹巴特略之家嘅建築架構。

對比米拉之家，巴特略之家比較色彩繽紛。

兩家中庭都係直接陽光採光。

天台嘅煙囪位同樣設計到唔似煙囪，而似藝術品。

今日嘅行程主要就係參觀兩個世界遺產建築作品。跟住就返咗酒店休息一陣先再出門食晚餐。返酒店前買咗支奶解渴，呢樣嘢都係幾難忘，因為我第一次買接近1L奶直接隊哂哈哈。

晚餐去咗食我出發前搵資料見到嘅分子料理，不過依家搵唔返叫咩名了。都係幾新奇嘅體驗，因為第一次食道道都差唔多係泡泡、啫喱嘅菜式，但味道上冇話好驚艷，淨係記得我朋友食完好似唔太飽哈。

最後以市區各藝術建築物包括米拉同巴特略之家嘅夜景作結。