文章寫於2016年5月15日

之前講完2012同媽媽遊台北4日3夜，今日突然就跳到講今年自己一個去濟州釜山6日5夜，中間係咪好似跳得太突然呢 😛

其實喺呢幾年入面，我都有去過其他地方嘅，除咗上個台北遊記提過嘅2013年遊台南中北，我仲去過台灣宜蘭，日本京阪神奈福岡沖繩，韓國首爾… 同最遠嘅巴塞隆納。只係我懶，其他中間去過嘅旅行未出到遊記住哈哈

而點解今次濟州釜山行咁想寫咗先呢? 因為今次我終於真係全程自己一個上路獨遊！之前有幾次我本身都係見到平機票 (包括日本福岡沖繩同韓國首爾) 就買咗自己份諗住獨遊，但後來見媽媽好似未去過呢啲國家，佢又講到想去睇下，就決定帶埋佢去玩下啦。不過其實我都有私心既haha 因為帶埋媽媽就可以有多一個人試多啲嘢食，尤其韓國好多食店嘢食要2人份起。

因為之前已經帶過媽媽去玩韓國，所以今次都屬於韓國嘅濟州釜山我就決定真係獨遊啦！而促成今敞旅程嘅就係HK Express嘅平機票 (其實之前好多次都係，多謝快運俾咗咁多機會我平住去旅行haha)。

本來我係諗住將首次獨遊獻俾日本名古屋，點知搵唔到啱時間嘅平機票，但就見到濟州去釜山回呢個組合幾抵，咁就唯有挑戰下自己去一個完全無粒字識睇嘅國家獨遊啦～