咖啡拉花紀錄 (至20220518)

咖啡拉花紀錄 (至20220518)

一切要由2015年開始講起… 每次飲咖啡見到咖啡師拉到個靚花都會覺得好勁,都會想知點做到,又幻想自己一學就會識 (因為覺得自己一向手藝都幾好哈),所以2015年就終於去體驗吓人生第一次嘅拉花班。

當時係同3個人一齊join嘅,包括我兩個朋友,同一個朋友嘅朋友。我哋一行4人去咗荃灣一間叫咖啡賞館Browny Cafe嘅店學 (我係睇返相先記得哈),我依家search返openrice佢仲喺度架! 但我唔係好記得佢當時係咪荃灣同一位置同埋睇我嘅舊相同佢依家唔同樣咁,唔通當時係入咗店入面另一private area? 😛

首先就當然係講解打奶同拉唔同pattern嘅原理同示範啦~但因為事隔咁多年加上無機會用到,我已經唔記得佢哋教嘅嘢了…

跟住就到我哋實試啦。呢次拉花班佢好不惜工本俾好多杯真咖啡我哋試拉 (不過呢個班幾錢其實我唔記得哈),同我一陣會提嘅2021年參加嘅另一班好唔同。咁樣雖然可以試到真實咖啡同奶嘅融合效果,但唔好嘅地方就係試拉嘅次數就少啲 (好似係每款拉兩杯),因為大家都唔會想咁浪費咖啡嘛,就導致大部分都係拉唔到個形嘅失敗品了。

其實今次佢有教哂我哋三種最基本嘅拉花類型,但除咗心型,佢嘅其他示範我就無影相,淨係影咗我哋自己嘅成果。而事實證明拉花係比你想像中難好多,但我仍然覺得自己有少少天分可以繼續鑽研吓哈。

呢個係我拉嘅最簡單嘅心型

跟住係鬱金香 (多重心形),最左兩杯就係我衰咗嘅成品啦 😛 (旁邊幾杯應該係人哋嘅下一pattern?):

跟住最後就係試葉子 (搖擺的心形),右上角係我嘅:

呢個應該都係葉子pattern (雖然唔知點解好似唔同樣),右邊係我嘅,呢個誤打誤撞好似比classic嘅更似一塊葉,幾自豪架 😛 :

呢塊咁自豪嘅葉咁啱朋友幫我拍咗片:


2015年嘅拉花班體驗就係咁多啦~當時因為屋企無咖啡機嘅關係,學完呢一次就不了了之。直到幾年前我其中一個朋友要定居外國,將佢嘅Delonghi EC155讓俾我,當時有試過想用佢打奶拉花,但因為無做任何research就去試,所以唔知要噴走水先,又唔識控制奶嘴,結果俾佢噴水兼飛瀉奶嚇親就一直唔敢再用… 直到2021年哈。

2021年完成咗我人生另一個里程碑之後,因為空閒時間多咗開始重燃返想鑽研咖啡同拉花嘅心。於是開始睇吓YouTube學返基本知識 (先知奶嘴用前要先噴走哂啲水 😛 )。跟住有日見到My Little Coffee有一個鐘包學識拉花班,想上堂實習吓就報咗名了。呢次上堂同2015年嘅好唔同,因為淨係教咗心型同埋其實正式淨係拉咗一杯咖啡。

之不過,呢堂教嘅方法其實我幾欣賞,佢著重先訓練你基本功。佢嘅先用水訓練你手感同手勢,再用奶加朱古力粉訓練你拉好個形,呢種循序漸進唔單止可以唔使浪費咖啡,亦都令我學識喺屋企時可以點用朱古力粉練習。之前聽過洗潔精方法,但學咗朱古力粉法我覺得會真實啲,因為用到真奶,又可以順便練打奶 😛 講起打奶,都多謝My Little Coffee嘅店員知道我想學埋打奶之後肯順便教埋我同俾機會我用佢哋嘅機打幾次。

不過最後得一杯真咖啡拉花體驗係幾唔夠喉,同埋想打卡嘅人就真係一次定生死 😛 而我覺得我今次個形雖然夠大同算對稱,但個心唔完整,望落拉得比2015年差 🙁

有咗呢次拉花重溫,之後膽粗粗第一次屋企試拉,好似嘔吐物 🙁 其實係因為唔識打奶,打到啲奶泡好粗好厚,於是拉完一次飲走少少杯啡啲泡再試再飲再試,最後勉強有心形先肯放棄哈,我要照紀錄呢個咁失敗嘅第一次 😛

20210401

失敗過後知道打奶先係最重要嗰步,啲奶打得唔好就有拉花技巧都唔會拉到。於是又透過YouTube了解多啲家用機打奶技巧,同tricky偷雞法,就係打出粗泡後用匙先倒走面頭粗泡再拉。呢個就係用偷雞法嘅成品,開始有個形啦:

20210405

於是用tricky偷雞法再試咗幾次,當中都有fail過,但fail嘅無影哈:

20210406

同埋試咗拉朱古力,呢個又係誤打誤撞拉出我覺得比純心更靚嘅心動pattern 😀

20210409

一直都用偷雞法嚟拉花,直到有一日打奶時望住個奶漩渦,突然好似領略到點打會無咁多粗泡,於是就有咗第一杯即打即拉唔用偷雞法嘅拉花啦!

20210415

不過當然失敗品繼續都有,而其實到依家我仲係比較多時候打到厚泡版,始終經驗未到家,同埋我知道咖啡機同所用嘅奶嘴都有影響嘅 😛 所以暫時我只拉到心型,未試到其他形。希望有日我可以喺度update我打到滑順嘅奶同拉到其他形啦~

同場加映用另一隻朋友送嘅拉坏杯拉花,用另一隻杯就要重新再練幾次先會”比較”成功,好難呀 🙁

20210421
20210426_1

飲一啖令佢望落個心靚啲哈 😛

20210426_2

相隔咗個幾月,喺某做過咖啡師嘅朋友度再次學吓更深入嘅打奶原理,試吓將正確方法應用喺自己嘅咖啡機,但一直唔成功打到拉到花嘅奶,連心都拉唔到 🙁 直到今日終於又拉到心形,但倒奶做mixing時其實知啲泡都係粗,所以個啡底啡色會俾奶泡嘅白色蓋過咗。雖然仲係只係心,但相隔個幾月之後嘅一次成功都係好開心哈。唔知幾時可以打到真係滑亮、可以拉到更複雜圖案嘅奶 🙁

今次打咗大約300ml奶,拉完一杯cup形杯,就想試吓拉唔拉到大杯,結果睇下圖就知另一杯唔成功啦 😛

20210620

自從上個月拉咗個泡狀心之後就繼續fail到7月,終於再拉到返個似樣啲嘅心。7月呢張係最後一張心圖了,之後會拉到其他嘢先update,就睇吓會幾耐先有得update一次 😛

20210724

相隔3個月終於開始喺拉其他嘢方面有啲眉目,雖然仲差好遠,但見到少少痕跡已經好感動 🙁 (呢次其實我係用咗拉葉子(搖擺的心形)嘅手法,但望落似鬱金香(多重心形)嘅…)

20211013

一星期過去,今次唔試搖擺住啦,轉試直接推3個心出嚟,效果又幾好,好似比出去學時更似樣,有進步嘅感覺好正 😛

20211021

因為講過除非再進步唔係就唔更新,加上新一年自己都迎嚟事業上嘅轉變,有一排少咗整咖啡,所以就再事隔4個月先有新相啦~不過先出個特別嘅失敗品,係想試葉子但failed哈

20220212

跟住就當然係進步嘅作品,比上一次推多咗1個心,個形都靚啲 😀

20220214
20220225

因為2月14嗰杯實在係一大進步,所以要搵我嘅熊合影哈,再下次更新又唔知幾時了

近排因為清潔咗部Delonghi機,打奶泡好似出氣勁咗,我再次打唔返滑嘅泡,要用匙先倒走面頭粗泡再拉 🙁
不過喺重新適應打奶嘅同時我都想試拉葉子,好似搵到個手感 😛
依家就一邊等我嘅新咖啡機 (終於買咗正式E61頭咖啡機 Lelit MaraX 😀 ) 到一邊再練吓手勢先

20220306
20220307
20220309

MaraX喺3月中終於送到,好型仔 😛

即刻用佢嚟試拉我練咗一陣嘅葉子先,不過因為打奶同拉花技術都未到家, 拉咗幾次都拉唔好哈哈

20220321 新機第一拉
20220323 泡太粗
20220324 泡太薄
20220326 歪咗

純葉子都係有啲難,加返啲心靚啲有成功感啲先 😛 (氣泡因為豆太新鮮)

20220411
20220412

雖然始終拉得時好時差唔穩定,但有咗新機對打奶係掌握好咗,換靚機送技術講得啱哈 😀

部Delonghi EC155其實打奶功能仲好好,所以我選擇送出去俾朋友玩,臨送前拉多次確保運作良好先
之後呢刻先發現我之前打奶打得唔好係因為我無除支打奶棒個外層,除咗先打可以變得返一出氣孔,啲氣集中啲係打得好啲… 再加埋拉花技術進步,今次用舊機拉得仲好哈

20220418

舊機送走咗就專心用新機練啦,都係練住葉加心先,事實證明係會進步嘅

20220426
20220430

之前嘅泡其實都算粗,今次下面呢個啲線嘅粗幼其實先係最好,睇得多識得留意多咗啲奶要幾流動先最啱
雖然打唔打到係另一回事 😛

20220508

5月12日呢個係我近期拉得最好一個啦,雖然下面葉嗰part啲線條仲可以再好啲,仲啲心終於對稱好感動~

20220512

跟住就係繼續練吓葉子線條啦,下一次再update就要係成功嘅一張

20220514

不過5月18日突然好想試吓一步登天拉天鵝,結果係有少少天鵝形,但又似屎形哈哈

20220518

This Post Has One Comment

  1. Ma man hin

    Wow 勁 好詳細ga記錄🤣

發佈留言