文章寫於2016年5月15日
第五日 7 MAR 2016 (MON)
原計劃：
落實行程：
Check in Busan Cafe -> 札嘎其市場 -> 甘川文化村 -> 濟州家西面站分店 -> 廣安里海灘 -> 橋村炸雞西面站分店
仲可以Google Maps睇下我全個trip住過同去過玩嘅景點：
今日一朝早搭鐵路嚟到另一個我期待咗好耐嘅地方，位於南浦站7號出口嘅Check in Busan Cafe。因為呢度係一個好有文藝氣息嘅地方，好似係專為鍾意旅遊嘅客人而開咁。最重要嘅係佢有得寄未來明信片，即係你可以要求佢哋幫手喺未來某一日先幫你寄出呢張依家寫定嘅明信片。我決定要喺自己生日嗰日先寄出俾朋友，算係生日做下特別嘅事 😛
另外佢哋都有賣自己設計嘅明信片同其他飾品工具，我都幫襯咗幾張明信片，好多都靚過出面賣架。
寫之前其實我都順便喺呢度食咗個all day breakfast早餐。佢個早餐雖然炒蛋唔夠香港我食過嘅咁滑，但其他嘢都係好正，好多款，賣相好靚。尤其個厚多士好有特色，裡面有栗子粒架haha
當食完嘢拎走碟之後，你會發現下面係一張釜山地圖，標示住咩位置有咩景點。佢哋真係好有心，都好細心明白到旅客嘅需要 (店員仲好好人咁送咗一張新嘅俾我留念)！仲有要讚嘅係，除咗佢哋好願意幫我裝滿水樽俾我送藥之外，當我臨走嘅時候，一位年輕女職員應該因為聽到我係咁咳而主動問候我，真係好窩心嘅舉動！
呢間店其實係一對夫妻開嘅，男嘅係韓國人，女嘅係台灣人，所以除咗韓文，佢哋都識聽同講普通話的 (仲有英文)，大家唔使擔心溝通問題。我去嘅時候咁啱老闆娘返咗娘家，無緣見到網上描述佢熱心嘅一面。但見識到老闆同普通一位女職員都咁好服務態度，可想而知間鋪有幾咁好～推薦大家有時間都去坐下慢活下，我自己都留咗成朝幾個鐘架 (因為寫明信片寫得太慢haha)。
因為時間嘅關係，我無等到寫哂所有明信片先走，我決定今晚返咗酒店再繼續寫，聽朝再過嚟寄。
今日天氣咁好，真係好啱起行到甘川文化村。但去之前，我決定去咗札嘎其市場睇下食唔食到烤盲鰻先，搭鐵路去札嘎其站10號出口就到啦。點知行咗一圈，好似都搵唔到上網講嘅嗰間盲鰻碳烤店。另外可能都因為我上一餐all day breakfast未落哂格，又怕其他店嘅二人份量盲鰻食唔哂唔知俾唔俾打包，我最後都係放棄咗，食唔到烤盲鰻係呢個旅程除咗Zipline外另一樣最可惜嘅事。唯有下次再嚟韓國嘅時候先食啦，到時要搵個伴一齊嚟share哈。
跟住就喺市場附近搵1-1/2/2-2號小巴搭上甘川文化村啦。上到村，買咗本指南，上面有提及甘川文化村內有咩景點，同埋有邊啲checkpoints可以印印仔換明信片 (其實唔太靚) 😛 有咗本嘢就可以開始好似尋寶嘅探險啦，逐一景點擊破！
因為未食午餐嘅關係，雖然未肚餓，但都應該要食啲嘢。所以當我見到呢粒我喺香港未見過嘅嘢食時就眼睛一亮，買咗一份入去坐低食。其實粒透明嘢本身無咩味，好似果凍，主要係食朱古力醬同花生粉嘅味，味道唔差幾得意。當韓國食過之後，我發現近期香港好似多咗人講呢樣嘢，原來佢叫水信玄餅，真正係嚟自日本。唔知係香港興咗好耐，我因為食完先留意佢多咗？定真係近期先興呢？
食完繼續上路… 其實我當日都差啲喺甘川文化村入面迷路，行咗少少冤枉路，諗過會唔會行唔返出嚟。所以大家要多留意地下同牆上嘅指示，因為入面真係多梯級斜路，行錯向下嘅路要上返山就攰死啦。
經過一番上斜落斜幾個鐘後終於行到終點，出返外圍，可以搭返1-1/2/2-2號小巴走啦。我選擇先去尋日食唔到嘅濟州家食海膽海帶湯做晚餐，不過為方便，我去咗佢哋嘅西門站分店。又係一碗唔辣嘅清湯，正！其實同普通海帶湯嘅差別唔大，係多咗少少鮮味，因為海膽嘅精華入哂湯水入面嘛。食過之後我只會講海膽都係生食最正，最有鮮甜味最滑口。熟咗嘅海膽其實就好似熟咗嘅蟹籽，你可以想像佢係有啲乾乾哋一舊，食落無咩味。
食飽嘅時候個天都黑到咁上下啦，廣安大橋仲唔亮咗燈!? 再次出發去廣安站嘅廣安里海灘，睇今次旅程最後一個景點 – 亮咗燈嘅廣安大橋。終於睇到啦，加上今日好天，完全無霧下 (會唔會係因為天黑!?) 嘅廣安大橋係幾亮眼嘅。
睇完影咗一陣相 (唔識影，點都影唔到人哋嘅feel嘅) 就返hostel。走之前決定記一記低釜山市區嘅樣貌。
同埋喺西門站附近買一盒橋村炸雞！難得嚟到韓國呢個咁出名炸雞嘅國家，無理由唔試下，咳緊都要試！試過之後好後悔我無俾貴少少買全部都係脾嘅款。因為雖然佢個汁係好食，但除咗雞脾，其他部分嘅肉都有啲鞋 🙁 不過我仍然會推薦大家去試，但鍾意食滑肉嘅朋友就最好叫全雞脾啦～
