文章寫於2016年12月4日

之前因為讀書嘅關係有機會可以出下學術trip (其實即係去研討會)，而我嘅第一個學術trip就奉獻咗俾重慶啦，已經係2014年嘅事。

2014年9月11日 (四) – DAY 1

18:25 香港國際機場 -> 21:00 重慶江北國際機場 -> 華辰國際大酒店

研討會舉行日期其實係9月11至14日，但我呢種小人物只需要出席9月12日嘅活動。因為唔想請咁多日假，所以我9月11日晚先出發，坐6點25分嘅飛機直飛重慶。經過兩個幾鐘嘅機程，9點嘅時候就到重慶江北國際機場啦。

主辦單位喺研討會舉行期間安排咗重慶華辰國際大酒店俾參加嘅人入住，所以9月11同12日晚有機會俾我體驗下五星級酒店嘅服務。重慶華辰國際大酒店 (空港新城百果路33號) 位於機場附近，所以搭的士方便又唔貴 (下面酒店相係走嗰日影嘅)。

其實checkin嘅時候都發生咗一段小插曲，因為分配酒店房方面出咗少少問題。酒店一開始講錯咗個房號俾我聽，結果我上到房門口拍卡入唔到。試多幾次都唔得之後，準備返前台問下之際… 突然有人過嚟開門。但係嗰個人開完門之後望咗我一眼就關門，完全無機會俾我解釋下發生咩事。不過都估到係酒店俾錯一間已經有人入住嘅房號俾我。返前台查詢之後，如我所料，佢再重新分配。其實張房卡 (無房號) 應該係啱嘅，只係佢寫錯咗房號喺放卡嘅袋度。

搞咗一輪，終於入到房啦。

五星級係唔同啲，間房真係好大。不過我影得唔好，睇唔出佢大 😛 雖然影唔到，但我記得佢係有兩張雙人床嘅，廁所亦都好大好乾淨。舒服完呢兩晚，跟住兩晚就要住返自己出錢嘅平價酒店，好大對比哈哈

另外，當我上咗房無耐，就有人送呢粒火龍果上嚟啦。我嗰時見識少，以為係酒店用嚟為搞錯房號呢件事賠罪。但後來聽聞五星級酒店多數有迎賓水果，所以呢粒其實係咪迎賓水果？

食完水果整理下行裝，就要瞓啦～

————————————————————————————————————

2014年9月12日 (五) – DAY 2

華辰國際大酒店 -> 悅來會展中心 -> 麻辣燙

瞓醒梳洗完，第一件事感受下日頭嘅重慶先。天氣質素好似唔多好，定只係霧？去之前上網睇過下重慶嘅介紹，有山城之稱，亦都係金融中心，所以都預計到同香港個樣差唔多。

好啦，睇完城市嘅景係時候去食酒店自助早餐，都幾多嘢食，早西式都有，味道都唔錯。我雖然為食，但其實對食無咩要求，只要有唔同嘢食俾我試就滿足，所以我嘅＂味道唔錯＂係咪真我都唔知哈

食完就去出席研討會啦，場地係重慶市悅來會展中心 (渝北區悅來濱江大道86號)。我選擇再搭的士，但… 居然無的士！就係呢個時候，有個嬸嬸嚟兜搭我，同我講佢可以幾錢車我。本來我係拒絕的，但佢再三遊說，最後我見佢係女人就上咗車了，諗返都幾大膽。

安全到達會場附近之後，我做咗另一件更大膽嘅事… 因為嬸嬸嘅車唔方便駛入會場，佢喺會場附近大馬路放低我。而會場周圍其實都做緊建築，所以我搵極都搵唔到路入去會場，最後我選擇問一問啲建築工人。點知佢哋話會場入口其實仲要行一段10幾20分鐘嘅路先到，問我要唔要搭佢哋嘅車，反正佢哋要駛去嗰個方向順路。之後… 我真係跟咗佢哋上車，係貨車嚟嘅，有4個大男人同我一齊搭。我同2個男人一齊迫喺中間嗰行，我坐最左開門位。一開始其實無咩感覺，佢哋都有同我傾下計，問我邊度嚟 (同問我覺得香港係咪中國一部分，要小心答哈哈)。不過搭搭下覺得好似已經駛咗好遠仲未到，馬路周圍又無咩人，心諗係咪真係未到定我準備有危險。好彩… 無耐開始見到其他著住西裝嘅人行出一座建築物，真係到啦，平安無事到會場門口 😛 呢一段路真係成個旅程最驚險嘅幾分鐘 (其實我都唔記得駛咗幾耐)。

跟住就係開始研討會，我知大家都無興趣聽詳情架啦，所以唔講啦。當晚完咗研討會之後，主辦單位安排咗大家去一間麻辣燙打邊爐。不過因為同好多權威人士一齊食，唔敢拎相機出嚟影相留念，無相俾大家睇了～

我諗如果只係我自己一個嚟重慶玩，一定試唔到重慶出名嘅麻辣燙，所以真係要多謝大會俾個機會我試到當地出名嘅嘢食哈。食完嘢返華辰國際大酒店瞓多一晚，跟住就真正開始自己嘅重慶一日遊旅行啦！