今日係第二次試整曲奇皮蛋撻，都算係成功咗 (因為屋企人話好食，我自己今次都算滿意個作品個樣 🙂 )，所以想介紹我嘅食譜俾大家。其實講開蛋撻，如果有得揀我係會買酥皮蛋撻，鍾意酥嘢哈。但因為屋企附近嘅餅店只有賣曲奇皮蛋撻，所以其實我好少買蛋撻嚟食。通常係某日放工突然想食，但就淨係買到溫暖嘅曲奇皮蛋撻過口癮，無新鮮出爐嘅。咁酥皮就比較難整，又唔想買現成酥皮，想食新鮮出爐蛋撻就唯有自己整曲奇皮蛋撻喇～

下面兩張圖係5月中時跟點Cook Guide馬田曲奇皮蛋撻食譜六個分量整嘅，除咗用吉士粉代替粟粉同鮮奶代替淡奶 (因為屋企當時無呢兩樣 😛 )，其他撻皮蛋漿formula都跟返。但其實當時我好好奇點解用咁少蛋，一粒蛋嘅份量 (~50g) 已經整到六個撻，蛋味咪好少… 出到嚟都的確個蛋漿色澤唔係好黃，蛋味較淡。

因為我用嘅蛋撻殼形狀同馬田唔同，同時唔係太熟屋企焗爐性能，所以當時都仲有睇吓其他食譜，睇吓其他人點樣調節個爐溫。見到有人係焗咗個撻皮先，焗到中途先再倒蛋漿，咁就易啲控制唔會蛋漿已經熟晒，個撻皮仲未熟。但當時我用嘅爐溫formula無記錄了，因為我最後仍然係焗到個蛋漿部分過熟花咗哈哈。

另外有樣上次好fail嘅位係我用嘅蛋撻殼本身已經矮身，個撻皮底我又壓得唔夠低，搞到無太多空間倒蛋漿，所以每個撻嘅蛋漿比例都好少 🙁 咁多出嚟嘅蛋漿就唯有用嚟整多個燉蛋食啦哈。

汲取上次教訓，今次決定用多啲蛋同埋特登買咗淡奶嚟整多次，因為淡奶其實係港式蛋漿嘅靈魂，不過依然係冇粟粉嘅哈。其實用其他無麩質嘅粉代替都得，馬田意思粟粉只係為咗唔好全部係麵粉，咁個撻皮可以鬆化啲。而我用吉士粉係因為喺馬田video comment度見到有個人話可以用吉士粉代替，咁啱我又需要用吓屋企啲吉士粉。上次用咗吉士粉味道唔差，所以今次照用。

比例上都係跟返點Cook Guide馬田嘅曲奇皮蛋撻食譜，但因為用咗吉士粉有糖，所以黃糖落少返啲：https://www.youtube.com/watch?v=y1TGS_OUvqk

步驟就跟馬田方法啦，詳細可以去佢youtube睇。

首先就係揉合解凍咗軟咗嘅60g牛油同32.5g黃糖：

跟住112.5g低筋麵粉過篩：

拌勻低筋麵粉同牛油黃糖：

跟住加埋30g打混好嘅蛋液落去，拌勻直至成團就可以用啦。為咗令麵粉嘅筋攤開，我哋需要放麵團入4度雪櫃至少一個鐘以上。而我選擇先壓落蛋撻殼再放4度雪櫃一晚，第二朝一起身就可以用啦。每一個撻撻皮大約用30g麵團。

因為上次壓得唔夠低，今次特別留意將撻皮底同邊位盡量壓貼啲。同埋整返個凸起嘅圓邊靚仔啲。

跟住就成個盤包保鮮紙放入雪櫃過一晚～

第二朝首先拎啲撻皮出嚟回吓溫先，同時就預熱焗爐同整蛋漿。

焗爐溫度今次改良自基絲汀港式蛋撻食譜：https://www.christinesrecipes.com/2009/03/cantonese-egg-tarts.html

會先預熱焗爐至200度。

預備緊焗爐時就整蛋漿。因為跟其他食譜轉用2隻雞蛋，所以改咗馬田食譜上嘅淡奶分量用少咗，糖都因為怕太甜試完味決定落少啲。

先用105g熱水溶咗25g黃糖，再加入55g淡奶，完咗呢步時我有試吓甜度，覺得已經夠甜所以無再加糖 (如果大家都想咁試，記得呢刻要比你想要嘅甜度甜少少先啱，因為呢個時候雞蛋未落㗎)。跟住就打埋兩粒蛋落去，蛋漿過篩備用。

同時焗爐預備好就可以放回咗溫嘅撻皮入焗爐嘅下層，要焗到見到撻皮邊轉金黃色 (我嘅爐焗大約8分鐘)。跟住拎出撻皮倒滿蛋漿，同時將焗爐溫度調低至180度。呢個時候見到有啲泡喺蛋漿中間。

我用咗鐵匙將佢哋拉去邊邊位，或者其實為靚應該直接畢走佢哋哈 😛

跟住成個盤前後調轉放入焗爐嘅中層焗約8分鐘 (因為從撻皮睇得出我嘅焗爐前後溫度唔平均，入啲嘅撻皮金黃啲，呢刻調轉可以平衡返啲)，或焗到見蛋漿”些微”脹起，就打開焗爐門2至3吋焗多約5分鐘直至熟為止 (基絲汀教用牙簽插入蛋漿，牙簽可以竪立即係熟)。

其實呢次都係有部分蛋撻面有少少焦同唔平滑哈。最唔平滑嗰個撻其實我有發現佢係我開焗爐門2吋前脹得好犀利嘅一個，所以我諗蛋漿有”些微”脹起時已經要打開少少焗爐呢步對平滑嘅蛋漿面幾重要，因為等佢唔會脹咁多。

但對比第一次都好咗好多了，放涼少少就食得 😛

其實配返杯港式奶茶先最香港style，但無紅茶包，咁就配咖啡啦 😀

睇蛋撻橫切面，今次雖然已經將撻皮底再壓低啲，但好似都係唔夠薄，可以再進步 😛