2015年6月6日 (六) – DAY 3

今日一大早8:30就出發行去酒店附近嘅Barcelona Cathedral巴塞隆拿主教座堂，一座哥德式建築嘅天主教堂。主要特徵係尖拱同著重光透入玻璃窗帶嚟嘅色彩。而因為尖拱比圓拱可以延伸得更高，所以哥德式教堂特別雄偉。

參觀完教堂出嚟見到呢個外國人坐喺外面坐得好型就好想影低，仲叫埋朋友扮佢坐姿俾我都影吓哈哈。

跟住9:30左右就去咗一間普通餐廳食早餐啦。因為第一次去歐洲，好驚訝外國serve餐會有埋果汁奉上，於是就一餐飲咗兩杯嘢飲… 不過要講吓呢邊嘅呢類茶餐廳餐對比香港係好油，我食過兩間都係差唔多質素。

跟住應該係去咗shopping一陣，因為我嘅相片紀錄直接去咗下晝兩點 😛 出發穿過Arc de Triomf凱旋門到Passeig de Lluís Companys大道通往Parc de la Ciutadella城堡公園。呢條大道好寛闊，兩旁又有棕櫚樹，好度假風情。

城堡公園入口擺放咗Monumento a Rius i Taulet，係一個紀念碑紀念前市長Francesc de Paula Rius i推動1888年世界博覽會喺巴塞隆拿舉行。

城堡公園都幾大，慢慢喺入面行逛。

行完城堡公園就出發搭車去Plaça d’Espanya西班牙廣場嗰頭參觀，大約六點半到達。揀傍晚時間嚟主要係因為夜晚呢邊會有個噴泉表演。

鄰近西班牙廣場有Plaça de les Cascades，嗰度有四條柱地標同大空地。

魔術表演未咁快開始咁就入去Museu National d’Art de Catalunya MNAC加泰羅尼亞國家藝術博物館參觀吓先。呢度前身係為1929年巴塞隆拿舉辦嘅世界博覽會建造嘅國家宮展覽館，1934年先轉為博物館。

博物館令我最有印象嘅係呢幾排好似管鐘咁嘅擺設。

參觀完MNAC入面就去外圍兜吓，見到MNAC館名擺設。

MNAC附近其實仲有個奥林匹克博物館，但係我哋就冇去參觀，選擇周圍行吓睇風景算。於是就見到呢個舉火炬嘅雕像Monumento a Ferrer i Guàrdia。

同埋見到呢個好高嘅Torre de Comunicacions de Montjuïc電信塔，配埋個藍天好靚。

9點左右就行返去西班牙廣場搵嘢食，嗰度有Arenas de Barcelona巴塞隆拿競技場(鬥牛場)改建嘅購物中心。

購物中心上層望落去會見到西班牙廣場係幾條道路嘅中心。

呢度都遠眺到啱啱參觀完嘅MNAC。

已經夜晚9:30，太陽終於開始落山。咁夜先日落其實幾正，多好多時間玩哈。

我哋再次是旦揀咗間西餐廳食晚餐，我記得係幾好食嘅但淨係影咗一張食物相所以搵唔返間餐廳名啦 🙁

Hea完食完晚餐到十點半，Magic Fountain of Montjuic噴泉表演開始。

好耐冇喺香港睇過呢類表演，係幾壯觀，背景嘅宏偉建築物有加到分。大家一齊企喺度睇全程15分鐘，好熱鬧。睇完就返酒店休息啦 😀