文章寫於2017年1月22日

2017年1月2日 (一) – DAY 2 (下)　　　*因為太長所以分做兩篇 😛

今次我亦用咗Google Maps嚟紀錄我去過嘅地方，大家可以入去初步了解吓再睇詳細遊記：

食完午餐就出去欣賞吓珊瑚沙海水浴場산호사해수욕장。雖然呢日天氣唔晴朗，睇唔到個海好藍嘅一面，但都見到海水分層深淺兩色，近沙嘅淺藍真係好靚 😀

跟住繼續驅車前進牛島最頂端嘅幻彩海螺、烽火台답다니탑同燈塔망루등대。下面幅幻彩海螺旁就係烽火台啦，大家可以行上烽火台頂高處遙望吓。

下一站係下高水洞海水浴場하고수동해수욕장，係牛島另一大海水浴場，同珊瑚沙海水浴場一樣以海水色彩聞名。聞說呢度海邊黑石較多，所以會多一層黑色嘅色彩，不過我唔係好睇到，但就睇到多咗海女嘅石像哈。

之後就嚟到東岸鯨窟동안경굴。附近係黑沙海岸검멀레해변同後海石壁후해석벽。相入面你哋睇到嘅係黑沙海岸同後海石壁，至於東岸鯨窟… 鯨窟入口要退潮時先可以見到，同埋其實要搭潛水艇先參觀到。潛水艇票牛島售價處有售，會由城山港出發，帶大家遊經龍頭巖、鱷魚巖、後海石壁同東岸鯨窟。

因為差唔多夠鐘還車，就去唔到最後一個景點牛島峰우도봉 🙁

到天津港還車之後仲有半個鐘先有下一班船，所以就去咗食杯牛島出名嘅花生雪糕。雖然呢間唔係牛島最出名嘅雪糕店，但我覺得佢嘅雪糕花生味都夠濃，係差在如果花生用碎粒上會更有風味 😛

話咁快下晝3點半了，夠鐘搭船返城山碼頭。

因為見時間尚早，我哋去行咗陣城山日出峰성산일출봉 (제주특별자치도 서귀포시 성산읍 성산리 78)山腳嘅鋪頭，為聽日城山日出峰行程視察吓環境，但其實都無咩嘢行。

無特定plan今晚食咩晚餐，所以只係由出發前儲左嘅城山食店list選一間鋪頭出嚟。本來呢間성산흑돼지두루치기 (제주특별자치도 서귀포시 성산읍 성산리 299-5)係諗住食燒肉嘅，但因為我哋其實唔太肚餓，去到又見到佢有媽媽未試過嘅海藻湯，一於就食呢樣～

本來都怕唔知媽媽食唔食到辣，因為上次我自己一個濟州旅行食嘅另一間海藻湯係辣嘅。但好好彩今次呢間同我上次嘅唔同風味，佢唔辣而且有豬肉，啱哂媽媽 😛 食到無大眾推薦嘅好嘢食，好滿足，就由我做推薦嗰個！