文章寫於2016年5月15日
第三日 5 MAR 2016 (SAT)
原計劃：
落實行程：
金喜善濟州馬尾藻湯 -> 濟州市外巴士轉運站 -> Alaska in Jeju -> 東門市場 -> 中央地下街 -> 七星路商店街 -> 東門市場
仲可以Google Maps睇下我全個trip住過同去過玩嘅景點：
因為前一晚太遲到金喜善濟州馬尾藻湯而摸門釘嘅關係，今朝決定再去多次，可以順便見下日頭嘅愛情橋… 結論係夜晚睇靚啲哈。
同時亦見到碼頭嘅海景，隨便影都好似明信片，好靚～
好開餐！好期待呀，平時我都好鍾意飲清湯 😛
飲一啖… Um… 個樣咁清嘅湯居然係… 辣嘅！雖然咳緊唔應該食咁多辣，但叫咗無理由食一啖就唔食，結果我決定撈哂湯入面口感好似海帶嘅馬尾藻落飯度送飯算，湯就間唔中飲幾啖，再飲返一咋水。其實平時呢種辣度係幾吸引我，帶俾我少少刺激又唔會辣到苦咁，而且馬尾藻好爽口，所以呢一道韓國特產馬尾藻湯我誠意推介俾會食辣嘅旅客，值得去試架！
食完早餐出餐廳發現落緊微微雨，但憑住僥倖心態我決定繼續出發去茶喜然綠茶博物館玩Zipline。行去濟州市外巴士轉運站搭701號巴士，搭到中途出太陽，仲諗個天真係咁眷顧我變好天!? 但再搭搭下… 開始落大雨 🙁 不過心諗可能到博物館就停雨呢？所以我都係決定繼續前行，照原定計劃落車轉車。
等呀等，點解等極都無巴士… 後來見到一架9XX嘅巴士，諗住終於有車，上車問下司機到唔到啦，點知佢話呢架車唔係去博物館。明明我search咗係呢架車的，點解司機話唔岩嘅？後來發現原來我真係搞錯咗，應該係等得太耐發緊夢睇錯號碼，好彩有問司機，唔係就唔知會坐咗到邊。
我要搭嘅應該係981號巴士 (根據Daum Maps，900號巴士好似都得？)。不過望清個站981好似唔停呢度，係停行前幾分鐘嘅另一個站，我岩岩應該係落錯車哈。於是我冒住大雨行去前面981號巴士嘅站，點知睇時間表下一班車要個零鐘先到。其實都有猶豫要唔要繼續去，因為咁樣等等下到博物館嘅時候應該得返3個鐘行同玩，而且又落雨… 不過一場黎到無理由唔去，於是決定繼續。
但依家都係入去呢間Alaska in Jeju食下嘢坐住等巴士先。
食到差唔多夠鐘，雖然雨仲係好大，但照行到巴士站等981號巴士。等呀等… 點解過哂鐘都無嘅… 呢一刻嘅我終於決定放棄啦，最期待嘅行程最後去唔成了 🙁
於是去返搭回程嘅巴士，提早開始行其他預定行程 – 東門市場、中央地下街同七星路商店街 (不過其實我到呢一刻都未知點解會見唔到架巴士，係佢早咗遲咗？無運行定其他原因？)
喺東門市場買咗呢個柑味嘅石頭伯伯糕特產試下，雖然味道唔差，但唔算特別。
跟住就係行街嘅時間啦，行嘅嘢無咩特別就唔介紹啦哈。
濟州最後一晚嘅晚餐，我決定再返東門市場睇下有咩地道嘢好食。不過可能因為夜啦，大部份店都關咗，最後選咗呢間都有人等緊嘅餃子店外賣做晚餐，再配支漢拏柑汁。今次呢支漢拏柑汁無之前另一間賣嘅咁好飲，有啲酸。至於餃子，再次，其實味道唔差，但無咩特別，香港都食到嘅味道。
過埋呢晚，濟州再見了～
