巴塞隆拿之旅 – DAY 1

巴塞隆拿之旅 – DAY 1

寫咗幾篇亞洲嘅遊記,係時候輪到歐洲啦。2014年因為讀書嘅關係某個週末去咗重慶學術trip,2015年再次因為參加研討會而有機會去巴塞隆拿,仲去咗9日,亦都係我第一次踏上歐洲嘅土地~

因為相隔咁多年,同埋我呢次旅遊嘅notes都俾阿媽掉咗 🙁 所以行程我依家已經唔太記得,只對當時比較特別嘅事有記憶,所以呢篇遊記主要係為咗post相留念哈。

2015年6月4日 (四) – DAY 1

參加研討會喺機票同住宿係有一定金額資助嘅,但因為我未用嘅資助金額唔夠坐直航,所以我就買咗HK$5534嘅Qatar轉機航班 (呢刻識搵平機票嘅我發現呢班機好貴哈)。

喺凌晨1:20搭上QR 815由Hong Kong飛往Doha [上午1:20 (HKG) – 上午4:40 (DOH)]。

第一次停留喺中東地方,即使係機場,都已經見到比較多包住頭巾嘅人,係幾新奇。不過因為係凌晨時份,無咩鋪頭開,所以中間停留3-4個鐘主要都係坐低抖吓。

跟住8:20am就搭上QR 139由Doha飛往Barcelona啦 [上午8:20 (DOH) – 下午2:15 (BCN)]。

連埋轉機時間,總共用咗19個鐘終於到巴塞機場。本身到機場之後應該都係啲好普通嘅行程,過關拎行李坐車去酒店咁,但居然等行李嘅時候俾我偶遇嗰位同我一齊參加研討會嘅朋友。咁驚訝係因為其實我哋係plan住同一間酒店,呢段時間亦會一齊周圍行嘅,只係搭嘅航班唔同 (佢搭國泰直航,因為佢有嘅資助多啲哈),係估唔到依家直接由機場開始就一齊行動。

不過其實我會喺機場撞到佢都係因為佢出咗啲小意外。佢係早過我到機場嘅,本身應該已經搭緊車去酒店,但因為佢遲遲未拎到佢嘅行李先延誤咗。遇到佢之後我就同佢一齊聯絡機場職員,知道行李要過多一兩日先送得返去酒店,所以佢首要任務係買返啲日常用品,好彩保險有得claim。呢個亦係我第一次見識到身邊人需要claim旅遊保險,自此我買旅遊保險時都多咗留意保險包嘅內容 (之前真係選最平就算哈)。

離開機場我哋就出發去酒店啦。我哋住嘅係BruStar Gotic (Ronda Sant Pere 53, Pral 1a. METRO “ARC DE TRIOMF” LINE 1),我係喺佢官網訂嘅,一單人床房有私人廁所9晚費用總共€591。我哋坐鐵路由機場去 “Arc de Triomf” 站,中途要喺 “Barcelona-Sants” 轉車。

因為到巴塞時都仲係下晝時間,所以我哋到酒店settle完仲有少少時間可以喺酒店附近閒逛。酒店附近就係巴塞凱旋門。

行咗一陣就搵咗間餐廳食晚飯。雖然朋友唔太好飲酒,但經我游說就一齊叫咗jar Sangria飲哈。話哂Sangria係西班牙嘅代表飲品,係用紅酒做基底再加啲水果增加甜味嘅水果酒。嗰jar Sangria比我哋想像中大,每人要飲幾杯紅酒杯size先飲得完,不過睇嚟我酒量唔差,飲完都只係有少少暈哈。

另外我哋仲叫咗西班牙海鮮飯。呢間餐廳係我哋隨機街邊搵嘅,食物飲品味道都唔差,但其實我當時無記低餐廳資料,好彩憑張相碟上La Fonda個餐廳名搵得返間餐廳位置 (Carrer dels Escudellers, 10, 08002 Barcelona) 😛

食完飯就暈暈哋咁行返酒店休息,諗返都幾勇哈。聽日就去參觀聖家堂內部啦。

發佈留言