2015年6月7日 (日) – DAY 4

今日開始係一連三日參與研討會嘅日子啦，食個包出發！

今次係我第一次參與咁大型嘅研討會，仲要一嚟就有唔同種類嘅幾個presentation… 所以成個研討會準備presentation已經夠我忙啦哈

研討會第一日夜晚教授帶我哋去食西班牙最出名嘅嘢食Tapas 😀

Tapas意思其實係正餐前嘅小食，主要用嚟送酒。但因為西班牙人創作咗好多唔同種類嘅tapas，輕盈至富飽足感類都有，所以我哋今次都當佢正餐咁食 😛 第一次試嘅我即刻俾佢俘虜咗，因為可以少食多款，啱晒我呢啲貪新鮮嘅人，同埋呢間真係好多款都好好食，我哋兩個後來有再自己嚟encore哈

食完晚餐喺街外遇到巡遊表演，睇咗一陣就同教授們各自返酒店休息啦，聽日繼續早起參加研討會～(因為歐洲呢個時候日照時間長，所以點解晚餐後都仲係好光)

——————————————————————————————————————–

2015年6月8日 (一) – DAY 5

繼續研討會日，不過今日食個豐富早餐先起行。同樣一個早餐有兩杯飲品～

跟住今日黃昏時間我哋決定去行吓沿海地方，因為其實仲好光，好多時間可以觀光 🙂

喺街上會發現巴塞隆拿真係隨處可見藝術雕像，例如為1992年奧運會所製嘅巴塞隆拿頭El Cap de Barcelona同埋為餐廳而製嘅大蝦雕像La Gamba de Mariscal。

慢步沿海地區欣賞日落景色真係好寫意。

呢日最後喺海邊搵咗間餐廳食海鮮晚餐作結 😀

——————————————————————————————————————–

2015年6月9日 (二) – DAY 6

今日我哋先一大早去行Barceloneta海灘，喺海灘食完早餐再去研討會。

估唔到海灘中間會有個健身地方，好正哈

選咗一間可以室外坐嘅店，望住個海吹住海風食早餐 😀

跟住就去會議館完成我哋最後一日嘅研討會行程啦。

呢三日以參與研討會為主，其實冇咩行程，而我又記憶模糊，所以好多建築物/風景只有相冇介紹啦 😛