近排有啲懶惰，但係又想繼續出吓遊記，所以選擇咗寫個短trip。呢趟吉隆坡四日三夜係俾自己hea吓嘅生日之旅，同時因為七月馬來西亞榴槤當造，而媽媽又好鍾意食榴槤，所以順理成章帶埋媽媽去玩。但因為帶住媽媽，而吉隆坡又熱，本身計劃咗嘅行程有啲都選擇放棄，例如黑風洞 (但都有部分原因係我怕馬騮 😛 )，輕鬆遊就算～

原計劃行程：

最終行程：(馬六甲一日遊嘅行程順序有啲變動，但下表無改 😛 )

第一日 5 July 2025 (SAT)

起飛前本身想帶媽媽去佢未去過嘅機場Intervals Bar食信用卡免費餐，但因為嗰邊比較遠，諗諗吓覺得時間唔充裕，所以都係去返食魚蛋粉算了。

另一原因係⋯今次係搭國泰，所以其實飛機上都係有嘢食，所以喺lounge食太飽都唔好哈哈。

就嚟落機啦，飛機上見到天朗氣清仲以為天氣會幾好，點知⋯

落機搭地鐵到市區，出返地面發現落緊勁大雨，係嗰種有少少水浸，踏步可能就會濕哂嘅地步。雖然酒店距離我哋只係5分鐘路程，但我哋都決定喺地鐵口等多陣先出發行去酒店，結果去到酒店都差唔多七點了。

呢間酒店係新裝修嘅，所以好乾淨，同埋我鍾意洗手盆喺廁所出面嘅設計，正！

不過唔係幾識欣賞酒店中庭嘅呢個設計（定純粹未起好嘢？）

喺酒店hea半個鐘左右，見到開始停雨，於是我哋出發去附近嘅亞羅街夜市食飯，原先計劃去雙子塔睇夜景就改期聽日先睇。

因為網上好多人介紹黃亞華燒雞翼，於是我哋決定直接喺呢度食雞翼之餘，叫埋其他餸做晚餐。我哋嘅座位正正喺燒雞翼嘅炭火爐附近，雖然有啲熱，但望住佢燒幾有氣氛，而佢嘅燒雞翼味道確實出色，又嫩！

而我哋另外叫嘅炒蜆，炒粿條，同埋炒菜都唔錯，滿足嘅吉隆坡第一餐～

——————————————————————

第二日 6 July 2025 (SUN) (上)

吉隆坡之旅第二日我哋參加咗KKday嘅馬六甲一日遊tour，國語導覽，用咗信用卡優惠後每位$280。

今次並唔係直接喺酒店等旅遊巴，而係八點左右有小型接駁車載我哋由酒店去另一個集合點等旅遊巴，好特別。

10點左右到達第一個景點馬六甲聖彼得教堂，附近有個小花園St Peter’s Terrace，同埋有聖經相關嘅裝置藝術。嗰時最深刻嘅係大家暴曬下喺裝置藝術附近聽導遊講解教堂歷史同相關聖經故事哈。

跟住就坐車去天主教教堂Church of St. Francis Xavier Melaka，位於馬六甲河附近，我哋由呢度開始起行漫步馬六甲河畔。因為跟住落嚟嘅景點都喺附近，所以我哋都係沿住河畔用步行方式前往。

途經一個叫Bastion Victoria嘅葡萄牙城牆碉堡考古遺跡。

跟住到達荷蘭紅屋區域 (雖然我影到啲屋唔紅哈)，呢度無咩人，好舒服 😀

不過到咗紅屋區域中心嘅基督堂Christ Church就多人啦～

睇吓基督堂對出嘅維多利亞女王噴泉附近幾咁多人。

跟住我哋就沿住馬六甲河畔行去聖保羅堂同埋A Famosa法摩沙古堡。漫步河畔呢個行程我覺得幾好，唔使成日淨係坐車點對點睇一下就走，好似會對個地方比較有記憶。不過最重要係呢段路唔逼，雖然曬哈哈！

中途會經過馬六甲海事博物館，造型幾宏偉。

喺行去聖保羅堂嘅最後一段路係要上少少斜坡，由斜坡望返落去，其實都輕鬆唔辛苦嘅。

聖保羅堂其實係一座建於1521年嘅古老教堂，後來被用嚟短暫安葬一位天主教傳教士聖方濟·沙勿略，因為佢喺呢個位設立咗一間早期 (可能係第一間?) 馬來半島學校。再之後喺荷蘭征服馬六甲後成為馬六甲防禦工事嘅一部分，堂內用作墓地。所以參觀嘅時候會見到一個空嘅墓室，同埋唔同嘅古代墓碑。

教堂廢墟前嘅就係傳教士聖方濟·沙勿略嘅雕像，係後期建造紀念佢到達馬六甲400周年。

參觀完聖保羅堂就落山向A Famosa法摩沙堡前進。

法摩沙堡係葡萄牙人喺馬六甲建立嘅一座堡壘，但被荷蘭同英國分別侵佔拆除之後，就剩返呢一個通往法摩沙堡嘅四大通道之一嘅聖地牙哥城門。所以其實參觀法摩沙堡就係參觀呢個城門啦～

參觀完啲古蹟，旅遊巴亦都由紅屋嗰邊嚟到城門呢邊等緊我哋，接我哋去食午餐。呢一日嘅下半場就下一個post再續啦～