2015年6月11日 (四) – DAY 8

今日嚟到我最期待嘅行程啦，就係去啲大自然啲嘅地方，蒙塞拉特山Montserrat一日遊！呢度最大特色係有奇岩怪石，同埋有個山上修道院。

因為相隔多年，已經忘記當年嘅交通方法。不過憑相可以肯定由山腳上山我哋係選擇咗Montserrat Aeri Cable Car登山纜車哈。我真係好鍾意由高處眺望嘅感覺，山景好壯觀！

上到山先見到一個特別雕像。

同埋已經見到好似鋸齒形狀嘅山峰。修道院亦喺不遠處。

我哋參觀修道院嘅時候咁啱撞正有唱詩班可以聽。修道院內仲有黑面聖母像可以朝聖，不過無影到相了。

午餐就喺山上隨便搵一間餐廳食。

食完午餐就開始行吓山。我哋Santa Joan同Santa Cova都有去，Santa Joan主要觀賞山上遼闊景色（同埋十字架？但我哋好似冇睇到），而Santa Cova就係去山洞睇最初發現嘅聖母像。

先上山到Santa Joan，往廢棄咗嘅小教堂方向走。

跟住就落山轉上Santa Cova。

Santa Cova步道上有好多同宗教故事有關嘅雕像。

慢慢行觀賞吓風景同雕像就嚟到呢個供奉住聖母像嘅洞穴小教堂。

呢個框望出去係真正嘅風景如畫哈。

參觀完洞穴教堂就回程啦～離開Montserrat之後我哋晚餐去返之前食過嘅Tapas店，因為真係好好味，又多款式選擇！至今2024年都仲回味緊，喺香港暫時仲未食到類似咁樣賣Tapas嘅店 🙁

最後以今晚見到嘅街邊雕像作結，巴塞隆拿真係一個好有藝術氣息嘅地方哈。