文章寫於2017年8月14日

DAY 4 (2014年7月14日)

跟住第四日旅程我哋由京都坐JR去大阪。到埗之後男仔們好似去咗個水上樂園玩，但我唔識游水，所以對玩水無咩大興趣，所以我哋決定各自遊。我應該係去咗行街shopping同寫postcard hea返日，所以就無咩點影相了哈。到咗夜晚我哋心齋橋集合，食咗餐豐富嘅壽司結束第四日 😛

——————————————————————————————————————–

DAY 5 (2014年7月15日)

食個靚早餐，幫尋日寫嘅postcard影張靚相就出發去神戶。

今日係神戶一日遊，但重點唔係參觀景點而係去當地食神戶牛 😀

進入神戶核心路段，周圍行下。

神戶有好多歐式嘅建築物，佢哋統稱北野異人館，所以充滿異國風情。因為唔夠時間入館參觀同貴，所以我哋只係途經下影下相，沿途都有唔同神社。

重點跟住就黎啦！食和牛！因為我哋食飯時間都遲咗，接近下午茶時間，所以店內無其他客人，我哋獨霸師傅 😛

呢間店係鐵板燒，先選要咩牛，師傅就會你面前幫你烹調，慢慢上菜。當時嘅我仲係初出茅廬，無咩錢，食3/400蚊已經肉赤，所以就好似只選咗中低價位嘅牛哈。但即使唔係最高級嘅牛，唔知係咪因為望住師傅整嘅呢個環境，加上係慢慢上菜慢慢享受唔會有食滯感覺，呢餐和牛係直至依家我仲係覺得係我食過最好嘅一餐牛！

食完就出發去埋我哋今日神戶最後景點 – 神戶港同神戶塔，望下海吹下海風hea下好正。

跟住夜晚就返大阪市中心食一蘭做晚餐結束呢一日了。