文章寫於2017年1月7日

2017年1月1日 (日) – DAY 1 (下)　　　*因為太長所以分做兩篇 😛

今次我亦用咗Google Maps嚟紀錄我去過嘅地方，大家可以入去初步了解吓再睇詳細遊記：

去漢拏山要搭740號巴士喺御里牧어리목站落車。其實樂天汗蒸幕附近係有740巴士站，但我居然唔記得咗。結果我特登搭502號巴士去濟州市外巴士客運站제주시외버스터미널 (제주특별자치도 제주시 서광로 174)，即係740嘅總站搭車，好蠢 🙁

下面兩張係740號巴士嘅班次表，特登影俾大家做參考。第一張係中韓版2010年版，第二張就係2016年最新韓版，但我睇過班次好似無點改。”濟州”出發時間就係指濟州市外巴士客運站，而”御里牧”就係漢拏山御里牧廣場어리목주차장嘅站。

去到濟州市外巴士客運站大約12點，所以就喺售票處買咗12:20嘅740號巴士飛 (1800won)。

坐咗大約半個鐘就到御里牧站啦，不過落車後仲要行大約15分鐘先到御里牧廣場，去到就會見到漢拏山嘅石碑同漢拏山本體啦。聽聞漢拏山11月份嘅時候落過一次雪，諗住1月嚟係冬天，加上出發濟州前一星期睇天氣報告見到寫1月頭可能有雪，心諗有無機會睇到落雪呢。但天氣變化無常，出發前一日再睇氣溫已經變咗5度到10幾度，不過都想博吓山上可能仲睇到地下積雪嘅景，點知係無架哈。或是應該話路邊都仲見到薄薄一片雪嘅，有啲失望啦～

另外，我去嘅時候咁啱係冬季慶典，一路行去御里牧廣場一路期待會幾熱鬧，有啲小食攤檔咁。點知雖然見到一兩個帳篷，但無開… 不過好彩係星期日，都總算有啲人流，有小朋友喺度玩滑雪盆，但”雪場”可能因為雪溶咗，規模好細。浪漫燈飾都有少少嘅，好似下面呢個雪人咁，係用真雪堆出嚟。但整體嚟講都有啲冷清，無咩特別嘢玩，同無嘢食。

本身預會留兩三個鐘，但最後留咗一個鐘就走咗了。我哋搭14:15嘅740號巴士出返蓮洞附近食三代湯麵會館노형삼대국수회관 (제주특별자치도 제주시 노형13길 11)。我自己嚟濟州嘅時候喺舊濟州嗰頭食過三代嘅豬肉湯麵，覺得好好味，所以特登帶媽媽嚟食蓮洞呢一頭嘅分店。不過好奇怪，呢間店個名牌無三代呢兩個字，令我懷疑係咪真係三代嘅分店。但佢入面嘅格局同餐具係幾似我上次自己食嗰間，所以當佢係啦 😛 今次唔記得影相哈。

食完午餐大約3點幾，諗到拎行李搭車去到城山日出峰嘅酒店checkin後可能都5點幾6點，無景點去到，所以決定喺市區留多一陣行埋E-Mart 이마트 신제주점 (제주특별자치도 제주시 1100로 3348; 10:00-23:00) 同Lotte Mart 롯데마트 제주점 (제주특별자치도 제주시 연북로 1)。咁最後一日就有多啲時間可以去埋舊濟州行中央地下街啦。

行到大約6點幾，我哋就返Four Seasons Hotel拎返行李，再搭車去濟州市外巴士客運站搭701號或者710號巴士去城山里성산리 취락구조站 (6600won)。坐咗大約70分鐘車就到城山里，落車後行5分鐘去Breeze Bay Hotel 브리즈베이호텔 (제주특별자치도 서귀포시 성산읍 성산등용로 42) checkin。我本身訂咗兩張單人床嘅房，但checkin嘅時候佢話upgrade咗一間大啲嘅房俾我哋。新一年有好開始幾好 😀 (以下係另一日早上影嘅，所以有陽光)

雖然唔係全海景，但都叫睇到吓海嘅房，好正。個景下一帖會有相俾大家睇 😛

放低行李之後都8點啦，所以要出去搵晚餐食。睇返資料，我搵嘅餐廳好多都關咗門，或者唔係好近酒店，或者又係食豬肉，所以最後決定去酒店附近一間有中文寫住烤帶魚，而又有人食緊嘢嘅鋪頭。餐廳係出咗酒店向左直行大約3分鐘。因為餐廳名無影到，所以都搵唔返佢嘅地址俾大家。我哋叫咗個鮑魚粥 (~10000won) 同烤帶魚 (~30000won)。帶魚其實係濟州盛產嘅魚嚟，同埋聽媽媽講無得人工養，所以佢貴都合理。唔知係咪肚餓呢，我覺得佢嘅烤帶魚好好味，有少少盬粒喺魚面，食落鹹鹹哋，魚肉都幾滑。媽媽話佢喺香港其實都買過帶魚煎俾我食，但我唔鍾意食。同埋香港嘅帶魚比韓國平。跟住我話佢要好似呢間餐廳咁烤先好味，可能我就會鍾意哈。

食完就返酒店休息了，聽日就係我成個旅程最期待嘅騎車載媽媽遊牛島啦！