第二日 6 July 2025 (SUN) (下)

上篇提到吉隆坡之旅第二日上晝參觀完馬六甲歷史遺跡，今篇就由食午飯開始。呢個day tour包咗一餐娘惹午餐，喺Restoran Nyonya Cantik餐廳食，係團餐嚟嘅。我見Google評分都幾高，有4.7分。

呢個團餐有六餸同一碗煎蕊甜品，味道真係幾好。有啲同枱團友好似唔食辣，所以通菜同埋咖喱我可以包底，呢兩個都係我覺得最好食嘅 😛

食飽之後就到雞場街自由活動環節，係馬六甲一條幾出名嘅商店街，可以買吓手信。

不過自由活動前佢先帶我哋去賣刀店參觀，幾有趣，大家當涼吓冷氣哈。

當日天氣真係幾熱同曬，所以我同媽媽喺雞場街都係主要喺手信店行吓。

同埋雖然冇耐前先食完午餐，但出發前聽過人提起雞場街嘅雞飯粒，好想試吓，所以見距離集合仲有時間，拉咗媽媽陪我入古城雞飯粒餐廳食嘢～雞飯粒其實係之前為咗方便勞動階層帶喺身食而發明，佢哋將啲油飯壓實變一粒粒，所以其實口感食落唔係太好，試完就知道都係普通一碟飯好味啲哈。

下晝四點左右參觀完雞場街就集合回程，個幾兩個鐘車程返到吉隆坡市區。尋日因為落雨冇去到雙子塔，今日就直接喺雙子塔附近落車，參觀日落時間嘅雙子塔。

雙子塔附近有噴泉表演，嗰度好多人好chill咁坐喺度。

夜色越深，雙子塔嘅燈光越明顯，同早少少嘅感覺又唔同。

最後睇完成個噴泉表演先出發去食晚餐。

今晚我哋食海腳人，一早知道需要排隊，所以就計劃好先拎飛，跟住再去隔離榴槤店DurianBB Park食完榴槤先返去。呢間榴槤店有賣一set唔同款嘅榴槤，啱哂我咩都鍾意試吓嘅人，不過因為有啲貴，所以我哋買一set share食就算。當刻食完真係會感受到個分別，幾有趣，不過依家嘅我已經唔記得哂哈。

食完榴槤行返去隔離海腳人，發現我哋嘅飛已經超過咗少少，好彩可以補飛 😀

呢間餐廳係出名食海鮮米粉，佢嘅海鮮粉入面有好多唔同嘅海鮮，包括魚蝦蟹魷魚蜆，啱哂我同媽媽兩個鍾意食海鮮嘅人 😛

我仲另外叫咗個螄蚶，因為平時好少有得食，咬爆佢會爆血腥味嘅汁，餐廳嘅醬汁調味可以令到個血腥味減低，夠特別！

另外因為之前同男朋友喺沙巴食過奶油蝦好好食，一直好想encore，見到呢間餐廳都有，所以叫咗幾隻，係回憶中嘅味道，正！

當日仲有個小插曲，平時Youtube都有睇吓9BoThew嘅飲食片，估唔到嗰日居然分別喺DurianBB Park同海腳人都撞到佢哋，證明行程一樣哈！後來有特登留意佢哋出嘅馬來西亞片，但好似無關於呢兩間餐廳嘅，可惜 🙁

返酒店之前經過呢邊嘅蜜雪冰城，決定喺呢邊試吓，呢啲過吓口癮就算，喺香港就唔使再試。

——————————————————————

第三日 7 July 2025 (MON)

第三日本身計劃去Batu Caves黑風洞，係一個印度教聖地。不過前一晚提前同媽媽討論佢想唔想行好多層樓梯，我又考慮自己有幾怕馬騮，最後就決定今日都係輕鬆啲算，因為其實去黑風洞嘅交通都唔係太方便。於是我哋今日就瞓到夠先起行行去新峰肉骨茶食早餐。

去到新峰當然要叫佢出名嘅肉骨茶，我哋另外都叫咗炒嘅肉骨茶，係網上有人推介嘅。炒嘅版本係第一次試，好惹味，但因為比較鹹所以需要配飯。而我自己就確實鍾意湯嘅嘢多啲。

跟住就搭車去Central Market，係一個街市改建嘅小型商場。

入面都有少少展覽介紹呢個中央藝術坊嘅歷史，同吉隆坡唔同景點。

佢嘅周圍都有啲人擺攤，好似市集咁，可以慢慢行睇工藝品，買手信。

喺中央市場逗留咗一兩個鐘就出發去附近嘅另一景點鬼仔巷。沿路會經過一個印度廟，叫Kuil Sri Maha Mariamman，佢嘅外牆雕刻咗好多公仔，好色彩繽紛，好有印度特色。

因為行到有啲熱，所以經過源昌隆咖啡店嘅時候決定入去hea吓飲返杯凍咖啡先。雖然早餐食得好飽，但因為都到午餐時間，所以都食少少嘢，同媽媽share咗一個咖央多士。佢嘅咖央多士係要自己搽咖央，冇我喺沙巴嘅咁好食。

Hea完就參觀吓鬼仔巷，係一個有好多唔同壁畫同裝置藝術嘅地方。

不過都幾多人，所以我嘅體驗麻麻哋，好快就行完想走哈。

除咗鬼仔巷有壁畫，同區唔同地方有時都會見到塗鴉壁畫。

喺同區行行吓就到咗茨廠街市場，其實係好似香港嘅女人街，我哋到此一遊式咁穿過就算哈。

跟住我嘅相片記錄就由三點呢一杯好味消暑西瓜沙冰之後冇咗，直到七點半先再出現下一張榴槤相，所以我諗中間我係帶咗媽媽去商場行街 😀

因為呢趟旅程其中一個重點係同媽媽食榴槤，所以得第二日嘅一set榴槤點夠，於是今晚最後一晚就計劃帶媽媽去遠啲嘅SS2 Night Market呢邊食榴槤。網上話呢邊嘅榴槤CP值高啲，出發前喺google map預先搵咗呢間叫DurianMan榴槤鮮生嘅榴槤店，因為佢嘅門面好似靚啲。

最後喺嗰度揀咗一粒高級啲嘅榴槤品種，不過好似都唔算平，都要港幣$360，但係好味嘅。我哋後來行夜市時，有見到夜市附近有一間都大型嘅榴槤店，佢賣得好似比我哋嗰間平，有啲不甘添哈哈。

因為食榴槤食飽咗，所以行SS2夜市嘅時候都冇咩特別睇啱，只係買咗一舊呢啲傳統花生粒煎餅，同埋酸辣鳳爪海蜇返酒店食就算了。

——————————————————————

第四日 8 July 2025 (TUE)

最後一日朝早本身有諗過去ICC PUDU食早餐，嗰度係一個大型熟食中心，入面有好多食肆賣唔同馬來西亞傳統食物。不過最後都係決定放棄早起，hea埋最後一日哈！於是我哋執完行李，直接喺酒店附近一間排隊名店Restoran Mon Chinese Beef Roti買佢哋嘅胡椒牛/雞餡餅做早餐。

不過因為太熱，我哋拎到入機場先食，凍咗啲食都仲係咁酥脆同juicy，難怪咁多人排隊買，推薦！

冇幾耐上機後又食多一餐，呢個吉隆坡之旅就以呢個有馬來西亞風味嘅飛機餐作結啦 🙂