文章寫於2016年5月15日

第四日 6 MAR 2016 (SUN)

仲可以Google Maps睇下我全個trip住過同去過玩嘅景點：

一大早搭500號巴士去機場搭內陸機去釜山。第一次搭內陸機，其實同普通國際線一樣，只係check行李嘅程序無咁嚴。我嗰時以為都係有液體唔得，所以過關前臨時拎起水樽想飲哂啲水，點知飲飲下個職員示意我唔駛 😛

終於到達釜山！由機場搭釜山金海輕電鐵到沙上站轉2號線到西面站，搭咗大約1個鐘。出路面行幾分鐘就到Calli Hostel啦，都係有獨立浴室嘅單人房。釜山呢間hostel係我呢個旅程最靚最乾淨嘅住宿，都係最貴嘅哈。

未食早餐嘅我已經打算食朋友介紹嘅范泰昔手工炸醬麵，但點知去到太早，佢要11點半先開門，要等多半個鐘。唯有周圍行下，不過又無咩行，所以最後入咗附近呢間coffee shop買杯熱朱古力飲下hea下先。

夠鐘啦，開餐！佢嘅炸醬係甜甜哋加少少鹹嘅，同之前我香港食嘅淨鹹鹹哋好似加咗花生醬嘅炸醬唔同 (我唔太鍾意花生醬)，而且因為麵條係即打嘅，所以好彈牙。值得一讚係佢嘅配菜酸蘿蔔都好好味，聽講係可以添的。雖然我已經飲咗成杯熱朱古力飲到飽飽哋，但我都食得哂成碗麵，證明真係好食啦！不過食到後期無哂麵條得番啲醬嘅時候，淨係試食啲醬就會覺得鹹。

食完就出發去景點啦～本身計劃咗今日去海灘，但見個天陰陰哋有啲想打消呢個念頭。不過今日唔去另一日都無時間，唯有照去，好彩最後無落足全日雨，而且都唔大。

釜山嘅鐵路網絡比濟州發達，好多地方搭鐵路就可以輕鬆到。搭去海雲台站，3號出口行十幾分鐘就到海雲台海灘，雖然無咩雨，但個天始終係陰陰哋。相信如果有藍天白雲拱照，個海灘會靚好多。因為落過雨，啲沙濕濕哋，所以我都無行落去，只係外圍行一圈望下小朋友同海鷗 (定白鴿?) 玩，吹下風就算了。

離開海雲台海灘之後去咗附近嘅海雲台市場兜一圈，睇下有無啱一人食嘅烤盲鰻店，因為海雲台市場出名食盲鰻呢樣韓國特色美食。不過兜咗一圈都無咩心水，最後決定盲鰻聽日去札嘎其市場先食。

今日食另一樣特色美食 – 鱈魚湯，去咗海雲台海灘附近嘅 정든대구탕 食。嘩！終於飲到一碗唔辣嘅湯啦！今次成功將湯內嘅料食哂兼飲哂成碗湯一滴不留。平時屋企整鱈魚只會用豉油蒸，都未試過滾湯，今次都係幾好嘅體驗。雖然湯內嘅鱈魚肉唔算好滑，不過湯真係好清甜。

食完午餐出發去第二個海灘 – 廣安里海灘，都係搭鐵路去廣安站，3號出口出行10分鐘左右就到。個天仍然陰陰哋，呢個海灘沿岸多咗啲草傘，除此之外個海景同海雲台海灘都幾似。不過呢個海灘其實仲有個特色，就係海上嘅廣安大橋。夜晚嘅時候廣安大橋會亮燈，照亮個海，睇過人哋嘅相影得好靚，所以我選咗接近夜晚嚟，希望親眼望下發亮嘅佢。沿岸慢慢由左行到右行咗個零鐘… 點解個天仲未黑，條橋嘅燈仲未亮嘅？仲有，條橋呢… 俾霧遮住咗 🙁

本身想搵間咖啡店坐住等，但因為食咗咳藥好似唔啱飲咖啡，放棄咗。跟住又諗，咁大霧唔知天黑之後啲霧會唔會散呢？最後決定奉上我嘅寶貴時間，今晚都係放棄唔睇，聽晚先再嚟。

出番市區嘅時候咁啱朋友想我幫手兌定韓幣，所以我就決定將聽晚嘅行程轉今晚，去南浦站嘅BIFF廣場同南浦洞地下街行下。一去到俾個景觀震撼到，好多食物攤檔呀，仲有一排排嘅占卜店。雖然好香，不過我唔識韓文，怕入去呢啲小店唔識叫野食，無膽嘅結果就係試唔到咁有風味嘅食店啦。

之後我決定去搵一間網人有人介紹叫FLASKicecream嘅甜品店，可以用針筒將啲醬唧入雪糕，幾得意。點知搵極都無，原來一早執咗… 早知嚟之前搵多啲資料啦。

因為仲未諗到晚餐食咩，於是上網睇下附近有咩特色野食… 搵到啦，海膽海帶湯好似幾特別！點知，去到濟州家南浦洞分店嘅時候已經9點左右啦，而佢9點關門，食唔到。

喺街邊再行下見到有賣血腸嘅，諗起今次旅程未食過血腸 (我之前首爾食過都幾啱我口味)，就決定買番酒店食。今次醒目指俾佢睇唔要其他內臟只要豬心同血腸，點知… 豬心都係得幾舊，而血腸唔知係咪因為佢見我其他野都唔要，所以斬多幾條俾我。我嚟唔切反應個碗已經擺滿一咋血腸，嗰刻其實都估到自己唔會食得哂，但我又衰無膽，無叫佢拎走。

番到酒店望住啲血腸，試下個醬汁先… 都係辣嘅，唔啱我點。喺無醬汁嘅情況下食呀食… 結果都係食唔哂，我諗食得一半，好浪費呀 🙁