文章寫於2017年1月22日

2017年1月2日 (一) – DAY 2 (上)　　　*因為太長所以分做兩篇 😛

今次我亦用咗Google Maps嚟紀錄我去過嘅地方，大家可以入去初步了解吓再睇詳細遊記：

尋晚好夜先到酒店，所以睇唔到窗外風景。今朝一起身當然要即刻拉開簾睇下係咪有海景欣賞。上一篇講到酒店upgrade咗我哋，間房由最平嘅市景二單人床房變咗三人房 (一單人床、一雙人床)。而景觀就無全海景，但都見到海，所以我唔知呢個係市景房，定佢已經算海景房。但唔理啦，每朝一起身可以望到個海慢慢食早餐，真係人生一大享受。我未來如果搵到錢都要買間咁嘅屋俾自己同屋企人住 😛

因為牛島回程嘅船最遲5點幾開出，為免無船返嚟城山呢邊，早出發早返嚟最安全，所以10點食完早餐就出發行去城山碼頭啦。碼頭同酒店都算近，行大約20分鐘就到。一出酒店，望到個天都陰陰哋，睇嚟今日影嘅相都唔會好靚啦。但今日有車，算係有嘢遮頭，落雨都唔怕哈。

去到城山碼頭就先拎form填個人資料，因為買來回，所以要填兩張。填完就去售票處買船票，來回票每人5500won。售票處唔會收你填嘅form，因為係同船票一齊喺上船嘅時候交俾船員嘅 (來回都係)。

城山碼頭開出嘅船有去牛島天津港우도천진항同河雨木洞港하우목동항。本身諗住選去河雨木洞港嘅船，因為嗰邊附近有間好出名食漢拏山炒飯嘅可以食完午餐先租車出發環島。睇時間見河雨木洞港11點有船，我哋到城山碼頭加買飛大約10點45分，時間啱啱好。滿心期待咁跟人流去排隊上船…

船頂層有蝦條賣，自助嘅，自己入錢入錢箱就可以拎包蝦條走。而有咩用呢？就係用嚟餵海鷗啦，下面第二幅圖可以睇到真係會有好多海鷗圍住搶食，幾壯觀。

船行駛咗大約15分鐘就到牛島啦～

影完相第一時間當然係睇下食漢拏山炒飯嘅餐廳喺邊啦。點知發現悲劇悄悄地發生咗… 點解GPS定位我喺天津港嘅 🙁 睇返時間表，明明11點開出嘅應該只有河雨木洞港，而去天津港嘅應該11點半先開… 始終諗唔明，到今日都未明 🙁

但發生咗嘅嘢就係發生咗，考慮行去河雨木洞港都幾遠，唯有天津港呢邊租車。行咗一圈之後選咗間好似最有熱誠嘅店租咗架3輪電單車 (電動車?)。其實去牛島前都有上網睇過資料，牛島嘅3輪電單車係需要國際車牌先租得。但因為濟州唔認可某啲地方例如台灣嘅國際車牌，為方便無車牌嘅人都可以租車環牛島，所以近期有牛島店舖引入咗電動車。而呢間店一開始叫我選車都無問我有無車牌，只係後來臨近俾錢，佢先問咗句。聽到我話有，佢就話GOOD GOOD，先叫我拎出嚟登記。

最後我就租咗呢架白色嘅3輪車，收費30000won租2個半鐘。架車雖然係幾靚，但我發現佢上斜無咩力，幾驚佢會停咗跟住倒後。同埋顯示器好似講電量唔係油量，所以我懷疑佢可能俾咗架電動車我，唔通見到我個樣唔似識揸車…

間店租車俾我嘅時候有提到3輪車環島一圈唔計影相嘅話大約45分鐘，所以2個半鐘係夠食嘢加影相嘅。其實我都信佢講嘅，但我個人鍾意慢慢嘆，唔鍾意急。本身唔計食嘢2個半鐘其實我估都可以夠時間慢慢環島睇風景，但依家要預埋食嘢一個鐘，我已經預咗會遲交車，只係睇遲幾耐同佢會唔會真係罰 😛

因為唔知餐廳附近有無位泊車，所以見珊瑚沙海水浴場附近有個好大嘅停車場就求其泊咗喺度。點知好快就有個嬸嬸行過嚟要我俾1000won佢，原來呢度係要收費，點解周圍無寫嘅？(其實我有諗過佢係咪呃我唔識嘢，因為拎車嘅時候我見到都有其他人泊，但無人收佢錢… 即係見到先收？)

但最慘嘅係，泊完仲要行多5分鐘先到餐廳，而行到餐廳，發現佢門口原來都有空地可以泊車 (不過唔大，可能泊到幾架3輪車)。即刻覺得自己好蠢，所以要提都想去呢間餐廳食嘢嘅大家唔好學我啦 🙁

呢間餐廳叫로뎀가든 (제주특별자치도 제주시 우도면 우도해안길 264)。其實主菜只有兩款，就係鐵鍋魷魚或者豬肉 (兩溝都得)。我就點咗最出名嘅鐵鍋魷魚한치주물럭同漢拏山炒飯한라산볶음밥。漢拏山炒飯係唔可以單點嫁，一定要連埋佢嘅主菜一齊點。鐵鍋魷魚我就無影到相，淨係得漢拏山炒飯俾大家睇。食完大部分主菜之後，侍應就會上炒飯，將材料包括海苔芝士喺你面前逐一落鐵鍋。先堆成心型俾你影張相，跟住就會加蛋漿開始整成漢拏山樣。我見之前人哋食嘅漢拏山炒飯係仿火山爆發，即係蛋漿由山口流出咁，而唔知係因心情定依家全面改咗用食落質感似蟹籽嘅綠色一粒粒嚟仿生滿綠林嘅漢拏山。唔好見我哋呢個好似好亂有啲醜，我諗本身係可以整得幾靚嘅，因為我見另一枱嘅炒飯綠色一粒粒真係整滿成座山，靚好多 🙁