第二日 30 January 2025 (THU) (續; 下篇)

玩完兩個水上活動之後，距離午飯仲有少少時間，所以男朋友就喺Sapi Island沿岸浮潛一陣，而呢個我就無試，因為浮潛鏡無度數，我都冇帶隱形眼鏡，我潛咗其實都睇唔到嘢，所以就算啦。

午餐係day tour包咗嘅自助餐，喺島上玩嘅人大部份都係食呢個自助餐，所以一開始好多人排隊，不過啲嘢食都夠食嘅，味道就麻麻，因為有啲食物都凍咗。

離開Sapi Island前影多幾張相留念先。

大概1點零就坐船出發去另一個島Manukan Island，呢個島嘅水望落好似冇Sapi Island清。
同樣男朋友有出去睇吓有冇魚，不過好似要行得比Sapi Island出，啲魚都少啲。佢玩咗幾分鐘之後都上水去沖洗，再hea多陣就回程啦。

返到酒店之後，反正個身濕咗，我哋決定去酒店天台泳池玩吓。男朋友本身想教我游水，但我始終都係驚，唔肯浸個頭落水哈 😛
所以淨係喺池邊影咗啲相就算啦，而佢游完幾圈都玩夠，我哋就返房梳洗再出發去街。

梳洗完先去碼頭邊Cafe飲杯嘢食件cake，蛋糕價錢其實同香港差唔多 :O

跟住就去水上清真寺，淨係外圍影張相，因為時間唔足夠入去參觀啦，不過其實行程編排上都預咗未必有時間參觀，算係optional嘅行程嚟。

而今日另一個重頭戲就係一早訂咗嘅Fine dining。上網搵到呢間In Restaurant評價唔錯，所以決定帶男朋友嚟呢度提前食生日飯 😀
一邊食可以一邊望住廚師處理食物，係我幾鍾意嘅Fine Dining style。

呢間餐廳菜式選擇用色彩做主題，每一道菜除咗廚師/職員會親身上菜時介紹，伴隨都會有張卡，好有心機。
有時聽唔明啲英文，我就會睇張卡哈哈。要特別提係去到後期廚師可能聽到我哋講廣東話，佢轉用中文向我哋介紹，好有心 🙂

啲菜式我唔多喺呢度解釋，有興趣嘅可以睇相自行了解 (不過我好奇去search，發現佢menu依家已經轉咗)。

呢個係前菜，前菜冇特別寫喺Menu嘅。

Mussel & Jasmine Coconut

第一道菜冇清晰影到背面介紹，佢其實係一啲脆餅，由紅菜頭等蔬菜整成，搭配清清地嘅蔬菜椰青汁。

Prawn Soup

Salmon & Red Spinach

Slipper Lobster Pasta

Coral Trout & Italian Parsley

Lamb & Honey

Banana & Lemon

Honeydew & Avocado

最後多謝廚師特別為我哋整嘅額外生日甜品～

今次呢餐算係我食過頭一兩位嘅Fine Dining，我欣賞佢有主題，有職員亦有卡仔詳細介紹。味道中上，唔係一味賣泡泡，同埋佢係海鮮為主，正中我下懷無辦法啦哈哈。

—————————————————————————

第三日 31 January 2025 (FRI)

第三日我哋主要係市區遊，因為預留咗時間去按摩。

朝早去咗富源茶餐室食多士，嗰度環境有啲熱，所以男朋友食得唔係太舒服哈。跟住就去行碼頭邊比較新潮嘅商場Suria Sabah。

行咗陣街決定喺商場搵食，試吓馬來西亞嘅壽司店。呢間壽司店冇咩刺身壽司種類，好多都係加醬嘅壽司，我麻麻哋。

下晝3點夠鐘去Ventus Spa按摩，佢係一個細嘅門面登記完再帶你上樓按摩。門面唔係好grand，不過服務都唔錯。
按完之後就用spa送嘅免費單程接送服務去沙灘Tanjung Aru Beach睇吓有冇日落睇同行夜市。

可惜天公不做美，天氣麻麻，同埋後期有啲雨。

食咗牛豬串燒同脆薯，除咗牛肉串燒有啲韌，其他幾好味。

夜市兜完個圈最後決定食碗粉就算，而呢碗粉其實係印尼國民美食Bakso，即係牛丸湯麵，好好味！今日用呢一餐作結很好～