上一篇寫完河內遊，繼續寫吓東南亞嘅遊記先。馬來西亞沙巴係今年年頭去嘅，都算新鮮滾熱辣，今次同男朋友去主要想慶祝佢生日，所以會體驗佢鍾意而我有啲恐懼嘅水上活動。行程上安排咗兩日day tour，所以其實都冇話咩行程改動，所以今次淨係出一張行程總覽，諗住去但最後去唔到嘅地方就直接喺表入面刪咗佢，等大家易睇啲。

行程總覽：

第一日 29 January 2025 (WED)

呢日搭緊車去機場嘅時候好奇search吓飛機嘅資料，諗住睇定係邊個閘口，點知就見到飛機延誤嘅消息。除咗去挪威嗰次因為香港打風延誤咗幾日之外，我好似冇點遇到過飛機延誤，好彩今日嘅行程係flexible嘅，所以延誤就當係俾多啲時間我去享受吓香港機場未去過嘅lounge啦哈哈。

講緊嘅就係呢個the Intervals Bar，佢嘅位置喺天際廊Skybridge 9樓，因為係喺閘口樓層上面，要行多少少路入去，所以之前旅行我都唔係好夠時間去。呢間餐廳同樣係持有Everymile/AE explorer信用卡就可以免費換到一個set，所以我就用我嘅信用卡帶男朋友一齊入去啦。

我哋分別叫咗一個Tapas set跟咖啡同埋大蝦意粉set跟果茶，而AE卡又再額外會送多杯welcome cocktail。不過如果同Plaza Premium Lounge嗰啲任食比較，佢嘅餐對男仔嚟講應該唔太夠飽，但係個意粉味道係真係幾好嘅，而tapas就夠特別！同埋餐廳望出去嘅景觀好chill，可以望住飛機喺香港嘅山群前升降 😀

喺餐廳食完Hea咗陣，就去閘口等飛機嚟啦。

適逢臨近農曆新年，落咗機出咗海關之後，喺機場有啲着住民族服裝嘅工作人員派柑，但可能因為嗰刻機場人流唔多，所以佢哋會想派多幾袋俾我哋，最後我哋兩個人就拎咗三袋。每袋入面好似有兩個柑，呢六個柑就成為咗我哋呢五日四夜旅程嘅生果哈哈。

喺東南亞交通主要靠Grab，所以一出機場就call Grab去酒店，方便快捷。今次我訂咗公寓形式嘅酒店，佢嘅位置係喺一間真嘅酒店上面，所以call車嘅時候定位the Mercure Hotel都得 😛

呢間公寓式酒店叫M Centro City Centre，佢係冇前台嘅，所以會喺入住前俾message你通知你去附近一個地方自助拎鎖匙，亦都因為咁所以如果需要寄存行李會冇咁方便。

日常生活需要嘅嘢個公寓都一應俱全，同埋都乾淨企理。

佢嘅露台係望到少少海景，呢個我哋嘅五日屋企我好滿意 😀

安頓好之後我哋就出去食嘢，因為遲咗到達沙巴，所以本身計劃嘅串燒就冇食到，我哋直接去大茄來海鮮餐廳食晚餐。因為沙巴都係近海嘅地方，所以都係出名食海鮮嘅，不過其實我發現啲海鮮都唔平。我哋叫咗魷魚、扇貝、軟殼蟹、奶油大蝦，同埋一碟菜。東南亞地方通常都係沙嗲咖喱味，所以今次啲海鮮多數都係呢種調味，但因為我鍾意冇咁重口味，所以全晚令我最驚喜係奶油大蝦，我係第一次食呢種味道，有奶味調和咗啲咖喱重口味幾正，心動想將來喺屋企整吓。

而呢碟菜都要特別講吓，我哋本身係叫咗番薯苗嗰類菜，但佢通知我哋賣哂，問我哋轉唔轉其他菜，佢講咗幾款之後我哋就隨意選擇咗一款未聽過嘅。查完先知呢隻係巴古菜(蕨菜)，我喺香港未食過，佢食落質感係有啲黏液感，有啲似秋葵嗰種黏液，本身我都係可以接受到呢種質感嘅，但唔知點解佢食到尾有啲苦味，呢樣就令我覺得麻麻哋啦，但係可以嘗試到一樣新嘅菜都令我幾開心哈。不過查咗少少關於呢款菜嘅資料後，要溫馨提示大家，有多項研究證實蕨菜入面係有可致癌物質，所以唔可以長時間食大量，大家想知得詳細啲可以再自己上網查吓～

———————————————————————

第二日 30 January 2025 (THU) (上篇)

嚟到沙巴點可以唔玩水，所以一早喺Kkday book咗浮潛跳島遊，包埋海底漫步同水上滑翔傘。我特登選擇酒店係喺亞庇角渡輪碼頭附近，就係為咗方便今日可以行路過嚟碼頭集合哈哈。八點幾到達碼頭，個碼頭已經好多人，因為唔同嘅團都係呢度出發。同導遊確認集合點，會合導遊後等咗陣就同其他團友一齊喺碼頭着救生衣等上船啦。

開船去沙比島先，我哋會先喺沙比島逗留四個鐘，啲預約咗嘅水上活動全部都會喺沙比島進行。

我都唔係太記得呢個係途經嘅一個小島定就係沙比島哈哈。

今日天氣都唔差，多雲但就唔使暴曬，係咪應該算好呢？如果冇參加額外水上活動嘅人可以喺呢度盡情浮潛。

落水前先幫男朋友影一張寫真，我覺得取景唔錯 😛

影完相導遊就通知我哋額外嘅水上活動可以開始進行，首先係海底漫步。喺碼頭等上船出海中心時都已經見到魚仔。

呢啲就係海底漫步用嘅頭罩，佢嘅原理係喺水底時條管會不斷輸入空氣去個頭罩入面，咁樣啲水就唔會湧入去，所以成個頭其實都唔會濕水，係可以自由呼吸。不過工作人員就會提醒你要扶實個頭罩，跟住個頭都只可以慢動作地郁動，上下左右要連埋個頭罩郁，如果唔係就可能會入水。聽到佢咁講我就開始恐懼，會諗如果做得唔好入咗水點算哈哈。所以其實呢個活動我全程喺水底都幾緊張，捉到個頭罩好實，感覺到啲水到下巴時就怯。同埋係我第一次潛入水底，當全個人都喺水底嘅時候會感受到水嘅阻力，喺水底行都有啲困難，所以同時我都捉到條引路繩好實，同埋行得好慢哈哈。不過好彩身邊有唔怕水嘅男朋友陪伴，係安心啲㗎。

話明呢次旅行係沙巴海陸空體驗，體驗完海底，再體驗埋空中先。水上滑翔傘呢個活動我同男朋友嘅恐懼程度就相反啦，因為男朋友畏高，所以今次到佢驚過我哈。不過我又唔係完全唔驚，因為嚟之前有上網睇人玩，見到有啲係會因為架船唔夠快所以中途玩到跌落水，所以我亦都有諗如果跌落水點算，叫男朋友要睇住我哈哈。呢個水上滑翔傘工作人員係會又加速又減速咁樣，務求令你有時隻腳會碰到水，所以當佢減速我哋好接近水面嘅時候我就好驚，而男朋友就好興奮，我哋兩個真係完全相反，好搞笑。不過玩完之後男朋友都發現就算畏高其實呢個活動都冇想像中咁驚，所以好多嘢都要體驗過先知！

玩哂呢兩個水上活動之後，我就算係完成咗我嘅落水使命啦，詳情喺第二日下篇待續…