第四日 1 February 2025 (SAT)

今日參加咗一個day tour去神山附近玩，因為6:30出發，要一大早6點前就起身，所以就可以睇到少少日出景色哈。

等緊旅遊巴嘅時候見到貓貓 😛

上車後導遊問大家食咗嘢未，跟住就話先帶我哋去食早餐，呢個本身個tour介紹冇寫到，所以唔知係咪導遊額外加嘅行程呢？因為唔知道有呢個行程，所以我哋出發前有喺酒店食前一晚買嘅包，好彩食唔飽，仲有胃口食其他嘢哈。

車程大約半個鐘後就到呢間瓊瑞興茶餐室，導遊話佢成日喺度食，佢推介食呢度嘅炒生麵。本身見到個名唔知係咩意思，上網查完原來擔波羅利係呢個小鎮Tamparuli嘅中文譯名。呢個麵炒得油份充足，唔會太鹹，軟硬係我鍾意嘅程度，所以啱我食，不過未到覺得好surprise。

食完嘢後再搭大約一個鐘車就到第一個景點，可以遠望神山京那巴魯山嘅一個地方。

喺嗰度用自拍棍影到張幾靚嘅合照 😀

有大約40分鐘俾我哋喺呢個景點周圍行吓，時間算充裕，不過我哋冇再行去其他位影相了。

隻狗好嘆，好想學佢哈哈。

由觀景台出發再坐多一個鐘車，就到今次tour嘅重點，揸ATV！今次呢個trip可以同男朋友一齊試呢樣新嘢，好開心～

其實沿途個景唔算話好靚，高高低低沙塵飄逸，有時又有啲水氹。全程一個鐘左右，係有啲攰有啲污糟，不過個體驗好值得，又可以測試吓男朋友揸車技術（係我勁啲哈！）。

路況有時係咁樣，但咁樣先刺激正！

安全玩完ATV後就坐多陣車去附近參觀乳牛場。

我好似係第一次咁近睇乳牛，之前係淨係睇牛。喺佢哋附近食牛乳雪糕 😛

可以參觀乳牛場嘅設備。

本身呢個地方淨係參觀好短時間，所以我行咗一陣就買咗盒咖啡奶企喺度等集合，不過後來撞到導遊，佢話延長參觀時間，我估因為有啲帶住老人家嘅團體行得比較慢，想俾多啲時間大家。其實係幾體貼嘅，不過如果可以早啲通知就好了。

於是我哋就再慢慢周圍參觀。

啱啱空置嘅設備房，突然企滿哂牛，好搞笑，唔知係咪等緊搾奶呢？定食嘢？

參觀完乳牛場，大約一個鐘車程去餐廳食午餐，雖然嗰時已經係三點，但可能因為喺乳牛場有食雪糕又有飲嘢，所以唔會好肚餓。早餐係自費，但係呢個午餐就係個團包嘅，每人可以選擇一份餐，同一杯嘢飲，我選擇嘅係Bakso肉丸河，肉丸彈牙河粉夠滑，呢個團餐又幾好味。

食完飯仲有啲時間周圍行吓，餐廳出面景觀都唔錯。

食完飯就直接回程返市區，車程都接近兩個鐘，好好喺車瞓一覺先。夜晚嘅時候有啲雨，但我哋都選擇照去夜市行吓，因為今晚之後就冇機會啦，聽日就返香港啦～

先喺夜市門口買咗燒魷魚，都幾多人排隊，啲魷魚幾厚肉彈牙，佢嘅醬汁幾好味，雖然對我哋嚟講有啲太辣。

跟住入咗去一間肉骨茶店，食肉骨茶同埋我叫咗我鍾意嘅豬腰，正！

最後仲喺夜市買咗啲串燒，燒雞翼，同埋印尼特色小食Keropok lekor返酒店慢慢配杯麵食，好嘆～Keropok lekor其實係炸魚條，第一次試，估唔到係幾煙韌得嚟重魚味，有啲似台灣嘅甜不辣，令我日後同媽媽去馬來西亞有再買嚟食 😛

——————————————————————————————

第五日 2 February 2025 (SUN)

最後一日喺沙巴啦，今日其實係搭下晝五點機，所以仲有半日時間可以玩。朝早先去行吓星期日限定嘅加雅週日市場，其實就係似香港嘅女人街，所以純粹行吓參觀吓，嗰度其實都有小食攤檔，不過興趣不大，所以行完我哋就要搵餐廳食早餐。

本身諗住食出名嘅味雅海南雞飯，點知冇開，所以就轉場即時喺Google搵餐廳，最後選擇咗呢間叻沙。味道其實幾好，不過環境好熱，男朋友食到出哂汗慘。

跟住就去食埋出名嘅甜品The Royal Coconut嘅椰子布丁，係真係幾清甜，同埋呢間店舖有冷氣，坐得夠舒服哈！

因為行街實在太熱，同埋我哋兩個都孭住個重背囊，所以我哋決定最後時間去Imago Shopping Mall商場行吓就算，同埋都喺嗰度解決我哋嘅午餐。離開前繼續食馬來西亞菜先，啲菜式全部係用香料名，有啲特別所以我都唔係好記得個名，條魚嘅味道我係第一次試，幾好味同好滑，而個牛肉我就麻麻哋，但係我男朋友就好鍾意。

食埋呢餐就直接搭Grab去機場，正式完咗呢個沙巴之旅啦～今次沙巴之旅試咗好多第一次，主要想令男朋友生日之旅難忘，都令自己好難忘！