第三日 13 October 2024 (SUN)

一大早7點起身去郵輪嘅餐廳食早餐，早餐都係自助餐形式，有越南湯河同煎蛋食，正 😀

食完嘢就再次坐郵輪嘅艇仔出海，去最後一個下龍灣景點Titop island英雄島。

呢個島嘅名字由來係想紀念胡志明總統同蘇聯太空人Titop一齊登上呢個島，所以島上面亦都有雕像。

上島之後可以選擇去沙灘游水，又或者登上山頂遙望下龍灣海景，我當然選擇上山頂。

望住啲相，風光明媚就係呢個意思啦～同埋多得男朋友嘅高超攝影技術，我可以有一張靚靚背面相。

上完山頂仲有少少時間就去沙灘範圍飲住椰青望人游水。

郵輪包嘅下龍灣景點就去完了，剩低嘅就係check out郵輪房同埋食埋個早午餐 (因為其實只係10點哈哈)。Check out前喺房嘆杯咖啡先走 😛

呢個早午餐就同尋日嘅午餐菜式差唔多。

之後11點郵輪就到達碼頭，落船等專車接送返市區，又開始3個鐘長征啦～2點幾到達今晚嘅酒店check-in後就出去行吓河內著名景點還劍湖，因為今晚酒店同第一晚係一模一樣，房型都一樣，所以就唔介紹啦。

到還劍湖後頂唔順太熱叫咗杯雪糕嚟食，好味！

還劍湖中央有一座建築物叫龜塔，係用嚟紀念傳說中嘅神龜，而呢隻神龜同還劍湖湖名亦息息相關。相傳越南某皇帝喺呢個湖度得到一把古劍幫佢打敗咗敵國，後將古劍歸還俾湖中嘅神龜，因此湖名叫還劍湖。

河內市區嘅景點其實都幾集中，喺還劍湖附近有一個特色嘅教堂St. Joseph Cathedral，咁啱有人結婚，可以順便睇吓越南人婚禮裝束哈。

教堂附近有幅立體壁畫幾靚。

沿住教堂嘅路行入巷仔，搵到我target嘅Still Color Cafe，係喺網上見到人哋推介嘅，不過我叫嘅凍奶啡奶味略嫌過重。

終於等到6點，夠鐘食我期待已久嘅T.U.N.G Dining，因為佢都係喺還劍湖附近，我哋直接行路過去就得。未出發前已經預先喺網上睇吓越南有咩CP值高嘅fine dining，因為難得物價低，喺呢啲國家食fine dining好似抵啲哈哈。見到討論區有人推薦呢間，價錢又負擔得到，就決定係佢啦。一入座見到呢啲裝飾物係幾有儀式感，好靚。

本身諗住加埋beer pairing，可惜嗰日無侍酒師駐場，所以冇得揀呢個option。於是男朋友選咗Juice pairing一齊試，而我就叫一杯白酒。佢嘅juice大部分都係Kombucha發酵茶，唔同味道，都幾開胃。

呢間餐廳每一道菜都會跟一張卡片介紹入面嘅主要食材，而上菜嘅時候其實都有職員用英文簡單介紹菜式設計，不過因為我英文差，唔算好聽得明，所以我比較想佢嘅卡片係介紹菜式嘅設計概念多啲 😛 貫徹fine dining嘅主要元素，所有菜式都係細細份，同埋如一貫分子料理咁好多泡哈哈，不過味道的確係獨特同好味嘅，值得推介～跟住落嚟我就唔逐樣介紹啦，大家有興趣可以睇相片入面嘅卡片介紹。

食完晚餐之後繼續行吓還劍湖先返酒店，因為當日係星期日，所以還劍湖附近一帶封咗路俾民眾玩樂，除咗有啲小攤檔賣嘢食同埋雜貨，仲可以見到河內嘅市民不論男女老幼圍住一圈圈踢毽，好有氣氛好歡樂，呢啲係現今香港睇唔到嘅嘢啦。

———————————————————————————

第四日 14 October 2024 (MON)

因為第四日行程唔多，所以放埋喺同一篇文章先。

嚟到越南點可以唔食出名嘅越南牛肉湯河，於是我搵咗一間係米芝蓮推薦嘅叫Pho 10，由酒店行15分鐘左右可以到。我叫咗生熟牛肉湯河，同埋見到隔離好多台都有叫油條，於是都跟風叫。油條份量有啲多，同埋佢係偏硬質地嗰種，浸湯食係幾特別嘅，不過我麻麻哋呢種質地嘅油條。而湯河嘅湯底真係好清好有牛味，河粉亦都好滑，加埋辣椒好食！

早餐仲未飲咖啡，於是就去咗越南好出名嘅連鎖咖啡店Cong Caphe諗住飲越南特色嘅椰子咖啡，不過我叫錯咗加花生醬版本，因為本身唔係幾好花生醬，所以覺得佢太甜同個花生味麻麻哋，不過對於鍾意花生醬嘅人我相信呢杯會係好飲嘅咖啡。

喺咖啡店休息一陣之後就去古街同埋傳統市場行吓。

喺市場收穫咗一啲夏威夷果仁，不過拎返香港俾媽媽試，佢覺得麻麻哋。

話哂越南都係出名按摩嘅地方，所以返香港之前都去多次做腳底按摩。因為唔想令到個身好油，所以45分鐘齋按腳哈哈。不過其實我覺得全身按摩會有感覺啲，淨係按腳好似唔太有按摩感覺。

最後午餐就喺古街附近食海鮮！Bookmark咗網上提過嘅呢間Seafood 68，點知去到見到入面一個人都冇，仲諗緊會唔會冇營業，不過問咗老闆係開緊可以入座食嘢嘅。而我哋亦都冇後悔選擇咗呢間，真係又平又好食！

食完午餐見仲有啲時間，於是返酒店拎行李之前去埋呢間聲稱係越南蛋咖啡始創店飲蛋咖啡。除咗越南其實呢款飲品其他地方好少會飲到，佢嘅起源係舊時法國人引入咖啡到越南，但因為越南牛奶貴，當地人就諗到用蛋黃做牛奶替代品，加糖打到蛋黃起泡放到咖啡上做出cappuccino嘅泡沫效果。呢間蛋咖啡值得推介，因為佢嘅厚蛋忌廉令到個飲品似甜品，但又繼續保留到啡味。

飲完蛋咖啡就行返酒店出發去機場。回程坐國泰夜機有嘢食有嘢睇，舒舒服服咁返香港啦～

今次旅程好多原訂嘅餐廳同地方都去到，而且都冇乜中伏，可以試到睇到河內好多唔同嘅特色嘢，所以呢四日三夜都真係幾豐富哈哈～