You are currently viewing 4日3夜河內輕鬆遊 – DAY 2

4日3夜河內輕鬆遊 – DAY 2

去到河內之旅第二日,嚟緊兩日嘅行程係搭郵輪喺下龍灣過夜,因為我係喺KKday度買咗呢個郵輪兩日一夜下龍灣全包tour,所以今次實際行程全部跟郵輪安排,除咗Kayak同Titop island兩個行程互調咗外,其餘行程都冇咩改動。

首先一大早辛苦男朋友去酒店附近買法包返酒店做早餐 😛 我哋叫咗兩個唔同口味,兩個都超好味,法包脆而入面嘅餡好Juicy,正宗越南法包真係好正!

跟住8點20分就喺酒店lobby等待專車接送去碼頭上郵輪,由市區去碼頭都要三個鐘左右,中間會有廁所位,成個過程好smooth,好好喺車上瞓一覺哈。

大約11點半就到碼頭嘅郵輪等待區,每一間公司都有自己嘅區域,而我book咗嘅就係Alisa Premier Cruise。

喺等待區見到我哋架郵輪啦,外觀真係幾靚仔。KKday上面其實有唔同嘅郵輪選擇,我最後選咗呢一間因為見佢房入面有露台,本身仲諗過有埋浴缸,因為搵過啲blog/vlog,有啲同一房型係有浴缸 (可惜最後我哋嗰間係無嘅),同埋佢嘅膳食係海鮮為主,啲人都讚賞,咁樣一千蚊一個人我覺得CP值都OK。

正式上船開始行程~

上船後先有一杯welcome drink,青檸飲料幾好味,同埋分配座位俾你坐低等食lunch。呢個郵輪同傳統郵輪一樣嘢飲全部要額外俾錢,所以佢哋枱面就預先擺咗一支紅酒,睇吓顧客開唔開哈。同時佢哋都派咗呢兩日一夜嘅行程表做簡單介紹同埋介紹船上工作人員。

正式開始Lunch,啲嘢食都唔錯,同埋有我鍾意食嘅湯羹類,睇我兩張相都各有一碗就知 😛

食嘢嘅時候架郵輪都會慢慢開去下龍灣中心,開始見到下龍灣嘅特色岩石。

食完嘢就可以入房休息一陣先,間房雖然冇浴缸,不過佢內籠都乾淨企理,同埋個露台好正~喺間房望出去有山有水,好chill 😀

因為跟住落嚟係去Sung Sot Cave鐘乳石洞同埋Kayak,所以我哋要執拾行李帶個防水袋裝住啲簡單水上活動用品出發。郵輪有自家嘅細船載乘客去石洞。

上岸後先要行一條長樓梯先入到去石洞內部。

因為我唔係第一次參觀鐘乳石洞,所以其實我嘅驚喜感覺唔係好大。同埋因為係同成團人甚至其他團一齊行,所以感覺有啲擠迫。不過值得一提係郵輪係會安排工作人員陪同我哋一齊參觀,仲會沿途介紹,呢樣值得一讚!

行行吓導遊提醒有一個心形嘅小洞,即刻做個情侶指定動作哈哈 🙂

行返出嚟望入去係咁嘅樣嘅。

呢張相右上角凸出嚟嘅石好似兩對腳,令我覺得好似兩個人坐喺崖邊睇海景咁,好正 😀

之後就出發去下一景點Luon Cave光明洞啦~

呢個洞係天然形成嘅細洞口,被附近嘅石灰岩峽谷包圍,你可以選擇坐船家嘅大艇,又或者自己Kayak穿過呢個洞口。雖然我唔識游水,不過我咁鍾意冒險,加上男朋友鍾意玩水,我哋當然選擇Kayak啦 (雖然沿途都有啲驚跌落水㗎) 😛

穿過洞口之後其實係一個被石灰岩包圍嘅區域,呢張相係穿過洞口之後望返返去,我哋喺呢邊仲見到崖上有馬騮,不過我影唔切相啦。

Kayak完都日落時分,係時候回程返郵輪繼續郵輪上嘅活動。

多得今日天氣好好,所以可以影到呢啲咁靚嘅日落照。

到郵輪之後先返房梳洗一下,嘆吓喺露台望出去嘅日落景。

喺房休息完就參觀吓郵輪嘅唔同地方,例如健身室同下面呢個泳池。其實呢個泳池係我選擇呢個郵輪嘅另外一個原因,因為男朋友鍾意游水,諗住有呢個泳池可以俾佢喺郵輪上玩吓,但發覺其實冇咩時間可以享受到,因為夜晚比較得閒嘅時候啲水就好凍,同埋個池都唔係好大,其實都唔係好游到,不過我哋都有去浸吓水嘅哈哈。

之後就上咗天台參加郵輪嘅Happy hour茶會,有啲水果同埋果仁食。喺呢個咁靚嘅日落環境,忍唔住叫咗兩杯cocktail嚟飲,因為佢有買二送一,所以送嗰杯仲可以喺第二日朝早飲。

Happy hour完Cooking class材料都準備好,我哋可以開始學包春卷啦,自己包嘅特別好食~我好似整咗三四條嚟食,如果唔係要留肚食晚餐,我應該會食更多 😛

玩完包春卷就落樓下餐廳食海鮮晚餐啦,係一個set dinner嚟嘅。就好似我一開始所講,佢係以海鮮為主嘅晚餐,我覺得幾啱我口味,有蠔有蝦有魚幾豐富。

食完晚餐返房欣賞一陣下龍灣夜景 (同埋去泳池浸吓水哈) 就要沖涼瞓覺啦,因為第二朝都要6點幾早起食早餐。

發佈留言