之前幾篇遊記都係同屋企人/朋友或者獨遊嘅行程，今次就出一篇同男朋友㗎啦。我哋今次去越南河內，因為得四日三夜，河內近近地兩個零鐘機程幾好 (河內同香港有一個鐘時差，比香港慢一小時)，同埋係我第一次去越南！
作為一個J人，同以往一樣去旅行前有一個詳細嘅計劃就一定嘅，不過同時我並唔需要嚴格跟足個計劃，所以今次同樣實際嘅行程同原本嘅計劃係有少少出入，俾大家參考吓 (冇錯，今次行程係我plan嘅，而我其實都幾享受plan嘢嘅哈哈)
原計劃行程：
最終行程：
第一日 11 October 2024 (FRI)
第一日一早搭HKexpress嘅早機7:40am出發，因為機上冇嘢食，所以我哋再次提早到機場嘅貴賓室食啲嘢先，又係我最鍾意嘅魚蛋河 😛
好幸運可以在晴朗的一天出發～話咁快兩個鐘多啲就到河內啦。
到埗第一件事係⋯男朋友因為肚餓喺機場買咗個漢堡食哈哈。跟住我哋call Grab去咗酒店先，因為未夠鐘check-in，所以淨係放低行李就出發開始行程。
睇網上嘅人講，去越南一定要食吓法國菜，因為越南俾法國統治過，所以啲法國菜幾正宗，同埋平係重點！所以我預先book咗一間入選過米芝蓮指南嘅法國菜餐廳La Badiane食午餐。我哋book咗11:30，係餐廳開門時間，所以早到咗少少都要喺counter坐一陣先入座。今次我冇純影餐廳環境，所以淨係分享吓嘢食相啦 😀
我哋各自叫咗3-course menu，不過點餐嘅時候其實啲英文介紹唔係好睇得明，因為識得嘅食物vocabulary太少哈哈，所以淨係見到某啲食材係鍾意嘅就叫 😛 因為要寫呢篇遊記先搵返個menu詳細睇，所以我唔多介紹啦，大家自己睇英文哈哈。
le gaspacho
Oriental tomato gaspacho, cumin hummus & oregano grilled artichoke.
呢個係蕃茄凍湯，幾refreshing。
le velouté
Cauliflower velouté in truffle oil, snail butter mushroom parmentier, saffron emulsion.
平時喺餐廳我係會叫白湯多啲，試完呢兩款我都繼續係鍾意白湯多啲哈 😛
跟住就到主食，我哋分別叫咗一個肉同埋一個燉飯。
l’agneau
Braised lamb shank in Moroccan spices, green olives & potatoes with roasted almonds, licorice sauce & honey-cinnamon glaze.
平時男朋友係鍾意食牛肉，估唔到佢呢餐叫咗羊肉，因為話平時少啲有羊肉叫。而呢個羊肉係幾嫩口，亦都唔重臊味。
la paëlla
Scallops and mussels risotto «Paëlla» style, grilled chorizo & piperade, Cognac bisque emulsion.
而我就偏好海鮮嘅食物，所以就叫咗個海鮮燉飯。如果佢帶子可以多啲就好啦 🙂
最後就係甜品。
le ceviche
Pineapple ceviche & exotic fruits, Curaçao lime sorbet.
雖然只係3 courses，但食到呢度已經飽飽哋，所以呢個時候覺得個青檸雪葩好好食可以消滯開胃！
le tiramisu
Coffee & chocolate verrine in Amaretto liquor, almond & cacao nibs crumble.
Tiramisu我記得難得地酒味都幾出～
食完之後我哋就去室內景點參觀Hoa Lo Prison火爐監獄。我覺得自己編排得幾好，因為出面真係好熱哈。睇資料佢原先係由法國殖民政府建造嚟關押政治犯，之後喺越南戰爭期間再被北越用嚟關押戰俘。嚟呢啲博物館對我嚟講就係反思戰爭嘅禍害。
太陽冇咁曬嘅時候就出發去河內著名嘅火車街，體驗火車喺身邊經過 😀 河內有兩條出名嘅火車街，舊火車街喺火車站嘅北面，聽聞因為之前太熱鬧成日有人阻住火車經過，所以俾警察管制。於是我哋就去咗網上嘅人推薦嘅新火車街，係喺火車站嘅南面。
快快影咗幾張相之後就搵咗間店坐底等火車，呢間The coffee train有放一張牌顯示火車幾點經過好體貼。不過佢嘅飲品麻麻哋，男朋友叫嘅朱古力好甜，而我試嘅越南特色啤酒溝蛋漿都唔太好飲。
等呀等，同我網上搵到嘅資料一樣，有一架火車正正3:30pm經過，想睇有幾近可以睇呢段影片～
睇完火車就快快離開返酒店check-in hea吓，因為太熱啦。
酒店嘅相後補啦，喺酒店hea咗陣之後我哋就出發去全身按摩。今次按摩喺Kkday預先book嘅唔算平，因為係大牌子嚟，我見佢有幾間分店。不過我貪佢有晚餐送，網上嘅人評價仲幾好。
嚟到越南就當然試越式按摩，網上資料越式按摩特色在於融合越南傳統醫學與現代手法，使用拍打、按壓、拉伸等技法，並結合中醫理論，以達到深層肌肉放鬆、促進血液循環、調和氣血的效果 😛 所以越式按摩幾啱我，而我男朋友鍾意大力拉伸嘅，就應該鍾意泰式按摩多啲。
按摩完職員會帶路去佢哋另一間分店食晚餐。我選咗牛肉湯河，佢會喺你面前加湯，好有儀式感哈哈。
而男朋友選咗北越另一特色食物Bun Cha，係將烤豬肉同粉麵分開上，再搭配甜鹹魚露醬汁嚟食。
食完就返酒店，因為我哋酒店喺鬧市區，所以返酒店途中遇到鬧市好似舉辦緊活動，搭咗個台好多人，個台仲噴咗啲紙屑出嚟，好有氣氛。
最後今日以我哋嘅酒店外觀同房相作結。呢間酒店係新起冇耐，所以幾新淨同埋靚。今次酒店房我同樣選咗個洗手盆喺廁所出面嘅，咁就方便兩人可以同時使用馬桶同梳洗哈哈。跟住聽日就係重頭戲遊輪下龍灣之旅啦～
