第三日 8 July 2024 (MON)

今日係旅程最後一日，如果尋晚無落雨其實係諗過去西子灣睇日落。依家雖然已經錯過日落，但都想去西子灣睇一眼，而且難得天氣咁好，於是朝早就變成揸電動車半日遊啦。

不過出發前先去高雄一間出名自家烘焙咖啡豆嘅Cafe – 真心豆行食個早餐，同埋買咖啡豆送俾朋友。我叫咗杯鮮奶咖啡同一舊多士，不過略嫌啡味比較淡，多士就芝士有拉絲簡單好味！

食完就直接餐廳附近尋找電動車開始西子灣半日遊。其實當時附近都有唔少可租借電動車，但好多時入面附嘅頭盔都冇咗。而揸電動車頭盔係必須嘅，所以就要行遠啲再搵下一架。我諗呢個可能係Gokube共享電動車其中一個沒落原因，太多人偷走個頭盔啦。

好彩最後都俾我搵到一架有頭盔嘅，終於可以起行。

喺半路見到大海風景幾靚，嗰度亦都車少，於是停一停喺路邊影咗幾張相再起行。

不過其實去西子灣嘅車路上好多時都係下圖嗰種程度嘅風景，多數有高樹遮擋視線。

最後終於開到西子灣觀景坡堤附近，停車休息一下觀鳥觀海哈。

跟住突然俾我喺沙灘度見到一隻熊，勁呀！

睇完隻熊都差唔多夠鐘回程啦，回程嘅時候試吓行另一條路，行鼓山碼頭附近嘅傍海車路。

還車之後發現個app入面有騎乘記錄，可以記錄自己用咗一個半鐘揸電動車去探索西子灣嘅行程 😀

去機場之前去埋南華觀光商圈睇吓有咩店舖，不過發現入面賣嘅嘢有啲似香港舊式商場賣嘅衫褲，所以都唔啱我哈。

不過俾我喺呢個商圈入面見到有間小店賣鍋燒意麵，係南部特有嘅食物，一於試試佢。不過怕時間唔夠，所以我選擇外賣去機場食做午餐。

地鐵站行去機場大樓前有條走廊入面有啲座位，正正可以俾我坐低食埋個麵。不過唔知係咪因為已經俾我擺咗一陣，啲麵索咗啲湯，同埋凍咗啲，又要食得急，當時覺得鍋燒意麵麻麻哋 (咁講其實係因為後來我阿妹去台灣都食咗鍋燒意麵而佢愛上咗，而我自己後來都有再去高雄試堂食另一間，係覺得呢樣嘢幾好食嘅哈，因為佢嘅麵其實係炸咗嘅蛋麵，係有啲彈牙煙靭，其實係我鍾意嘅麵質)。

跟住就順利入閘等飛機啦，再次望住飛機由高雄嘅工業景變成香港嘅山景，我嘅獨遊高雄之旅就正式完結啦～