第二日 7 July 2024 (SUN)
尋日返到酒店已經好夜，所以都無睇窗外係咩風景，今朝一起身開窗簾睇吓先。係樓景嚟，天氣同尋日一樣咁曬。
本身今日係計劃朝早旗津半日遊，但最後尋日已經去咗，所以臨時改變計劃去我本身都有諗過去睇嘅i-Ride。
搭地鐵去獅甲站行過去都要15分鐘左右。因為未食早餐，所以決定買杯飽肚嘅嘢飲當早餐。途中經過呢間芙奇茶苑，決定買佢嘅芙奇伯爵。佢入面有豆腐凍，係其他台式飲品店少見嘅，正正夠飽肚 😛
終於行到，亦都剛剛好飲完杯嘢飲。呢個i-Ride飛行劇院其實係喺一個巨大球幕上播放影片 (類似香港太空館嘅影片廳)，坐上會上下左右郁嘅座椅推你入球幕中間，同噴水噴風出熱氣5D效果 (佢話會有埋氣味，不過我唔係好感受到)，令你好似身歷其境咁。呢個技術申請咗專利，所以除咗台灣唔係好多地方有得體驗。
我今次睇嘅係非洲特輯。其實非洲係一個我冇特別想親身去，但係又想認識嘅地方，所以透過呢次5D影畫去感受都唔錯。睇完只可以講好值得，推薦大家去體驗！佢嘅真實感係畏高嘅人去睇可能真係會驚哈哈。
睇完之後出面仲有啲展示俾大家認識多啲個主題，同埋個飛行投術。
跟住繼續臨時搵新節目。Google Map見到附近有一個MLD商場就去行吓。個商場嘅設計係有啲工業風，不過入面唔多嘢行。最後見有時間決定去睇套電影，反正未試過入台灣電影院，當體驗吓。
選擇咗一套台灣愛情片嚟睇，夠哂台灣風味。喺呢個商場睇都令我體驗到多一樣嘢，因為呢個商場本身人流已經偏少，朝早時間更少，再加上呢套電影應該唔熱門，所以第一次嘗試包場睇電影哈哈！好彩今次有我隻熊陪我 😛
睇完電影就到午餐時間啦，今次試吓揸共享電動車去餐廳。呢個高雄市區共享電動車Gokube係我google搜尋咗一段時間先搵到，又真係成功俾我呢個外地人租到，嚟緊兩日都可以周圍揸啦，好興奮！其實自從台灣修例，市面已經好少唔需要電單車牌都揸到嘅電動車出租，因為電池續航力弱成本貴，所以當時俾我搵到呢種唔需要牌照嘅共享電動車出租係好難得。不過當我半年後再計劃去高雄時開個共享app嚟睇，已經見唔到佢show電動車位置，而啱啱再搵資料，原來佢今年3月已經公佈停止營運 🙁 不過好彩嘅係，我下一次再去台灣時就會有正式電單車牌可以輕鬆租車啦。
嘗試咗揸一小段路程去呢間老江紅茶食蛋餅先。呢間蛋餅店除咗出名蛋餅仲有就係佢嘅古早味奶茶係會有啲啡味，試完的確係好特別幾正 😀
跟住就決定慢慢經港口邊行去尋日淨係路過但未參觀哂嘅駁二藝術特區。
今日適逢星期日所以有市集，喺真愛碼頭附近先有一個小型市集。我係幾鍾意行呢啲文青嘢，雖然好少買，但鍾意睇哈哈。
唔知大家有冇發現天色有啲變化，呢張烏雲密佈相係用嚟預告我跟住會發生嘅事⋯⋯
喺大港橋同大義倉庫群附近有個大型啲嘅市集，今日主題係香菜市集，所以好多芫荽食物同飲品哈。喺嗰度仲有人唱歌，好有feel。
因為已經食飽，所以淨係買杯手工啤一路聽人唱歌一路周圍行吓，chill～
5點半呢個時候天色越嚟越昏暗，啲攤檔都開始收嘢，睇嚟大家都知就嚟落雨，只係，我冇諗過會落得咁大同咁耐⋯⋯
呢個灑水擺設同個天一樣，雨水就係好似佢咁突然話嚟就嚟了。
當時我企喺呢個位置其實係輕軌站附近，呢度有個好窄簷篷嘅建築物，我選擇咗企喺呢度避雨。因為當時嘅我仲係僥倖心諗啲雨應該落一陣就停，加上我有遮保護無事嘅。但當然最後情況係相反，雨越落越大，大到好似黑雨咁，仲要落咗10幾分鐘都未停，因為我企嘅簷篷其實好窄，就算有遮，下半身同埋對鞋都已經淋濕哂。當時諗咗好多嘢，早知趁未係好大雨嘅時候行過大港橋去對面嘅倉庫商場，咁依家嘅我就會喺室內行緊街。又或者早啲行去輕軌站有瓦遮頭嘅地方，咁我就唔會淋濕哂。可惜已經返唔到轉頭⋯⋯
時間到6點，啲雨好似短時間內唔會停，加埋下半身濕哂，呢刻嘅我決定要搭輕軌轉地鐵返酒店處理吓先 🙁
我記得當時喺忙亂中我仲要上錯另一方向嘅車哈。返到酒店接近7點，啲雨終於細咗好多，仲睇到啲晚霞。
嗰時諗如果我唔係因為個身濕哂，我應該可以繼續喺大港橋嗰邊睇到少少日落景。
呢次係我第一次喺外地遇落咁大雨整濕哂隻腳，亦因為有呢段經歷，呢個旅程變成我其中一個最難忘嘅旅行。
換上另一對襪，用紙巾整乾咗少少對鞋，再喺鞋入面鋪上一層厚嘅紙巾，我就再重新出發去駁二藝術特區，行埋其實我仲未參觀嘅棧貳庫同大港橋。
由棧貳庫行去大港橋呢段路沿途無咩人，有啲驚哈。
大港倉嗰邊有個大港橋模型，示範大港橋點樣180度轉俾啲船通過個港口。
下晝望住佢但過唔到，夜晚終於可以行經大港橋，喺附近睇夜景。
最後喺另一邊嘅角度影多張大港橋相就走了。
呢個時候都終於停雨。尋晚因為太夜，所以淨係行咗近酒店嗰邊嘅六合夜市範圍，今晚有時間可以行哂成個六合夜市啦！不過雖然話早，但其實都已經9:30哈。
首先當然要尋找蜂蜜苦瓜汁，係一個台灣先至買到嘅嘢飲，亦都係我一直心念嘅台灣嘢飲！因為啱啱落完大雨，成個夜市嘅攤檔同人流都少咗，所以搵咗一陣先搵到呢間有賣苦瓜蜜汁，係我記憶中嘅味道好感動。
我另一樣心念嘅食物就係雞腿卷，佢係用雞皮包住雞髀肉。雖然呢一樣香港都易買到，例如葵廣，但喺台灣夜市食感覺係唔同啲！不過都好難先搵到一間有賣，好彩係好味嘅。
慢慢行完成個夜市，10點零掃咗幾樣嘢食決定返酒店開住冷氣嘆住食。今日同樣喺呂家豬心買咗啲豬內臟，因為想試吓龍骨髓係咩質地同味道，但試咗發現同豬腦一樣都係漿住個口嘅嘢，所以食到好滯哈。
由天使熊陪住我食晚餐度過第二日～
