第一日 6 July 2024 (SAT)

上回提到還車後開始上旗後山睇日落嘅行程。

決定首先去參觀星空隧道，隧道壁畫咗一啲海洋生物同埋有啲燈飾。

不過個重點其實係一出隧道見到嘅景，眼前突然出現一片汪洋，可惜今日多雲，唔係應該仲震撼。

出咗隧道之後其實有條路可以登上旗後山，不過我怕自己唔夠時間，所以今次就冇行啦，所以就行返星空隧道回頭。

跟住行去旗後砲台。

由砲台遠觀大海。

逗留咗一陣就出發去遠啲嘅旗後燈塔準備睇日落啦。

一去到燈塔，已經有好多人等緊日落哈哈。

搵到個空曠少少嘅位影幾張相。雖然今日日落嘅位附近有一大片厚雲，但好彩水平線上仲有一啲空位俾太陽露個頭出嚟。

但其實我都冇等到太陽落哂就走，因為仲要趕搭船返棧貳庫。6點半左右我就開始落山啦。

落山後發現時間比預期早，所以可以喺旗津美食街嘅旗后海產買盒魚生行去海邊坐底望住日落食，好嘆～

食完魚生行多陣美食街買手信同買多個燒魷魚就剛好夠鐘搭船返棧貳庫。

再見啦旗津。

棧貳庫呢一架船比起鼓山嘅船係靚啲，同埋有主題。不過因為貴鼓山嘅幾倍，所以冇咩人搭。

跟住就照返原定行程由棧貳庫行去鹽埕埔(駁二)小夜市，不過因為都唔太肚餓，所以最後喺呢個夜市都冇買到嘢食，淨係純參觀哈。

行去鹽埕埔站途中有啲口渴，就買咗杯果汁，已經唔記得自己飲咩，淨係記得呢間係好飲嘅！

跟住經過鹽埕第一公有零售市場，入去兜個圈又買咗杯手工啤 😛

雖然今日主要揸電動車，但其實都行咗好多路，又曬又攰，所以最後淨係喺六合夜市近酒店嗰頭嘅其中一間店買咗一盒豬內臟返酒店配啤酒當晚餐就完啦。

最後順便開箱我訂嘅酒店 – 六合宿旅店 (Liuhe Su Hotel)，我覺得CP值幾高。我今次搵酒店嘅目標係有浴缸，因為想嘆吓。呢間算係乾淨企理得嚟又唔太貴，我喺Expedia訂兩晚HKD749 (佢嘅格局係豪華雙人房，其實可以住兩個人，所以兩個人住係抵)，仲要好近美麗島站，正！