第一日 6 July 2024 (SAT)

開始前先送上我本身嘅計劃行程同最終行程俾大家參考。

原計劃行程：

最終行程：

適逢一周年，想趁仲有啲記憶嘅時候更新吓上年生日自己一個遊高雄嘅行程。

呢次高雄之旅係計好多年前韓國之旅後再一次自己獨遊。本住唔想生日正日返工嘅念頭，但喺香港又冇咩特別嘢想做，所以決定出走去我最鍾意嘅台灣3日2夜。

而選擇高雄係因為想有啲新鮮感，加上發現佢交通係幾方便，機場又近市區，好適合3日2夜旅遊。其實高雄係一個我既熟悉又陌生嘅地方，當年大學畢業旅行嘅時候有跟朋友去做過義工，但對當時嘅記憶已經有啲模糊，甚至唔記得自己當年去過高雄嘅乜嘢地方，所以今次就當去一個全新嘅地方咁去探索。

搭朝早7:55班機，因為有信用卡申請到Loungekey，今次想入一個特別啲嘅Chase Sapphire Lounge，所以就算唔使寄艙行李，都諗住提早兩個鐘到機場。

於是，5點就出發去搭機場巴啦～亦因為咁，喺巴士上睇到日出哈哈。

6點半左右就入到lounge，呢個lounge除咗有得喺出面拎小食外，仲可以QR code落餐，例如我叫咗個egg benedict (不過味道麻麻哈)，但佢最吸引到我嘅係有bar可以叫cocktail飲 😛

慢慢享用完早餐就去登機口，飛機都準時起飛，天氣好好，機窗外睇到嘅景都好靚，由香港嘅山景變成高雄嘅工業景。

途中仲疑似有彩虹！(定只係因為啲窗反射？)

一落到機，發現高雄真係好方便，行咗冇耐就過到海關，兼可以到地鐵站搭鐵出市區。10點半左右就到高雄市中心美麗島站，見到高雄其中一個地標啦～

酒店房未咁快ready，咁喺酒店先寄放行李就開始我嘅計劃旅程 – 去食虱目魚湯。呢間大溝頂虱目魚米粉店淨係開到午餐時間，要喺啲小巷入面尋找間店。

呢度嘅虱目魚肉係幾特別嘅魚肉質感，喺香港未試過，不過魚腥味有啲重，雖然我唔太怕魚腥味，但食得多都會有啲厭同滯，呢個就係所謂嘅少食多滋味哈哈。

食飽就開始行高雄鹽埕區嘅一系列藝術區域啦。不過呢日天氣太好，好到太曬，行到出哂汗有啲辛苦哈。好彩係我自己嚟，如果同其他人一齊嚟應該會經常顧慮佢哋會唔會辛苦。

首先去咗參觀駁二蓬萊倉庫群，嗰度好多露天裝置藝術，同埋同鐵路相關嘅裝置。

跟住就順路到達棧貳庫。棧貳庫前嘅呢個鐵架都幾特別，係象徵「消失的24米」。當年為咗令蓬萊路同高雄港交界處道路寬度一致，要將棧貳庫東側部分倉庫拆除嚟拓闊蓬萊路，而拆除嘅部分就係大約24米長。而依家呢段被拆除嘅倉庫區域就以呢個棧前屋鐵架結構嚟呈現。

棧貳庫樓高兩層，入面都好多餐廳同文創小店。不過入到去最先吸引到我係呢個船期表。本身計劃行程係第二日先去旗津，但突然比原定時間早去到棧貳庫，又發現原來棧貳庫有船去旗津，跟住又怕聽日唔知有冇咁好天氣，種種因素下就決定改行程變7月6號去旗津啦～

本身以為只有鼓山有船去旗津，依家棧貳庫有船都好，唔使特登行去鼓山搭。(不過後來發現棧貳庫嘅船係貴幾倍哈)

去到旗津先行一陣美食街睇吓有咩店舖先，不過最後都只係買咗杯嘢飲，因為早餐食滯咗。我好似叫咗檸檬特飲，係網上有人推介，大熱天時飲真係正！

跟住就準備進行我成個旅程最期待嘅行程，揸電動車遊旗津！因為旗津呢個地方算係遊客區，所以啲車都唔會開得好快，係一個幾好嘅地方俾我試水溫，喺咁多年後再次喺台灣揸吓電動車。同埋係得呢個地方先比較多租電動車嘅舖頭。

有咗呢架電動車，整個遊旗津嘅行程都變得好順暢，同埋有車代步係真係輕鬆咗，可以成功喺半日就遊覽哂成個旗津。

因為電動車係以時租計，所以決定先揸到最遠嘅景點再返轉頭。

沿住海邊嘅路一路去，先到達環太平洋公園同風車公園，好多人放特別造型風箏。

跟住最遠揸到旗津七柱鳳山寺就調頭了。

回頭直揸到旗津海岸公園～

旗津出名嘅打卡地 – 彩虹教堂到達，不過得自己一個我就唔打啦，影低佢哋就算。

再睇吓人滑浪，行埋附近嘅雙螺台同海珍珠裝置就去還車了。

還車之後就開始上旗後山嘅行程啦，但因為太多相，上山嘅行程就留返下一篇講啦～